Los efectos de la xuba del petroleu

L'oru prieto yá val casi'l doble qu'hai un añu y la xuba de les últimes selmanes ye muncho mayor que la que provocó la crisis enerxética del añu 1973. L'escenariu ye asemeyáu: inestabilidá n'Oriente Mediu, duldes macroeconómiques y una economía norteamericana metida en pufos. Anque anguaño la dependencia enerxética ye menor y les enerxíes verdes tan medrando a esgaya xunta una meyor situación de les economíes de munchos países. El casu ye que'l barril Brent ya s'asitia nos 41,39 dólares mentanto'l que'l barril Texas superó los 45. La especulación nesti mercáu ye la principal razón d'estes xubes anque tamién la situación d'Iraq, el xuiciu contra la petrolera rusa Yukos, la inestabilidá política en Nixeria y Venezuela, la xuba del consumu mundial d'enerxía en parte pol esaxeráu gastu de China y la India, la cayida de la producción pola presión de los países de la OPEP y la escasez d'una materia prima como ye'l petroleu de la que sigue dependiendo'l desarrollu mundial pero de la que yá nun s'atopen nueves yacimientos rentables. La idea de que'l petróleu ta escosándose ta tan asentada ente los axentes que remanen el mercáu que la otra selmana, l'incendiu d'una refinería en Texas, foi escusa pa los brokers pa tirar p'arriba tovía más pel preciu del barril de petroleu. Por de pronto, la xuba de más del 30% nel preciu no que va d'añu va repercutir na inflación, nel xorrecimientu económicu y nel emplegu de la mayoría de los países. Ensin duldes, una mala anuncia.

Los consumidores tan notando yá esta xuba, y asina les gasolines de más octanaxe yá marquen nos postes del país precios d'un euru (166,38 pesetes el llitru). Nun se descarta que'l preciu de la gasolina y del gasoil crezan esti branu alredor d'un 15% más, ello cuando los combustibles yá llevaben un añu de xuba constante agravada pola aplicación del tramu autonómicu del impuestu sobre hidrocarburos.

El gasoil ye un bon exemplu d'esta xuba. El 31 d'avientu de 2003, últimu día enantes de la entrada del impuestu autonómicu, el llitru de gasoil "A" taba en 66-67 céntimos según gasolineres. L'añu 2.004 entamó con xuba, y asina, n'añu nuevu'l combustible más barato mangóse na raya de los 70 céntimos. Ocho meses dempués, el gasoil más barato que pueatopase ta yá en 77 céntimos en gasolineres de centros comerciales y en 78-79 nes gasolineres con bandera de marca petrolera, amenazando con ponese esta mesma selmana na raya de los 80 céntimos, ello ye, 14 céntimos de xuba n'ocho meses, una xuba d'alredor del 18% qu'equival a ventitrés de les antigües pesetes.