Los ecoloxistes denuncien la contaminación de Llangréu

Ecoloxistes n'Acción d'Asturies congracióse ayeri públicamente poles declaraciones del Ayuntamientu de Llangréu p'activar un plan de saneamientu atmosféricu col qu'echá-y el frenu a la contaminación en conceyu. Sicasdí, la organización ecoloxista camienta que la información que s'apurrió hasta agora sobre esti plan ye confusa por demás y que nun se correspuende cola llei vixente.

Los ecoloxistes llamenten que'l conceyu entovía nun-yos dio'l parte d'emisiones contaminantes en conceyu del 2.003 que tienen perdíu dende va meses, y, colos datos que tienen, reconocen que ye verdá que les emisiones menguaron del 2.001 al 2.002, pero argumenten qu'ello nun quier dicir qu'haya que ser permisivos y esperar, como dixo l'alcaldesa, hasta'l 2.005 p'aplicar los valores tope nuevos d'emisión que manda na llei porque, anque ye cierto que la nueva llexislación ambiental nun va entrar en vigor dafechu hasta'l 2.005, la llei yá esiste y ye aplicable dende ochobre del 2.002anque almita delles concesiones pel momentu

D'otra manera, la organización diz que, colos datos del 2.002, la estación de Turiellos perpasaba los topes llegales de ) 125 µg/m3 en dióxidu d'azufre en más de trés mediciones a lo llargo del añu. La normativa pa les partícules PM10 tamién s'incumpliría.

Según los ecoloxistes, la llei pon de tope les 40 µg/m3 y les marcaciones 66,5 µg/m3. Según Ecoloxistes n'Acción, colos nuevos topes llegales yá nun sedríen Llangréu y Avilés los únicos conceyos d'Asturies baxo declaración d'Atmósfera Contaminada, y sedría preciso esparder esta clasificación a tol área central d'Asturies