Los bienes del executivu, d'accesu públicu

La xunta d'esta selmana del Conseyu de Gobiernu del Principáu d'Asturies alcordó que los datos de declaración de bienes particulares de tolos miembros del mesmu se faigan públicos. Sicasí, la publicidá d'estos datos nun s'estiende a los datosque puedan facer peligrar la seguridá de los integrantes del Conseyu, órganu másimu del executivu asturianu.

Esta ye la decisión que más llama l'atención d'un conseyu de gobiernu que tamién robló alcuerdos con grandes presupuestos, rescamplando ente ellos los 1.040.000 euros que la Conseyería d'Industria y Emplegu manda pa financiar les ayudes públiques enxertees nel Plan d'afitamientu y Competitividá de les PYME, una llína d'ayudes que tienen l'oxetivu de sofitar proyectos pa la integración de les PYMES na Sociedá de la Información y el remocique de les técniques empresariales nos sectores d'industria, comerciu, servicios y construcción.
Esta partida presupuestaria ye una continuación a los 1.380.709 que yá se repartieren con cargu a estes ayudes.

Otramiente, del Conseyu de Gobiernu de güei salieron 472.546 euros que van dir de la Conseyería d'Ordenación del Territoriu pa obres d'esfaltao de caminos, trayida d'agua y saneamientu n' Ibias y Somiedu. Dientro d'esta partida una parte va pa la recuperación de le dunes nos sableros de Rodiles y Misiego, en conceyu de Villaviciosa. Pela so parte, la conseyería de Presidencia dio de pasu un gastu de 883.000 euros pa contratar de les obres en caminos y urbanización nos conceyos de Vilanova d'Ozcos, Tinéu, Sariegu y L.lena.

Tamién s'aprebaron 365.000 euros en polítiques pa colectivos en riesgu de marxinación o esclusión social. D'esti importe, la parte más importante (245.000 euros) va dir pa programes locales nos conceyos d'Avilés, Carreño, Xixón y Uviéu, mientres qu'otros 60.000 euros van empobinase a Avilés, Llanes, Uviéu, Villaviciosa, Ribera d'Arriba, Cuaña y Ribesella con cargu a programes pa la integración del colectivu xitanu. 60.000 euros van tamién pa Cáritas, col oxetu de la construcción d'un centru d'acoyida de transeuntes dientro del programa "calor y café". L'Institutu de la Muyer recibió 11.141 euros pa la soscripción d'un conveniu cola UXT pal desarrollu d'un programa de formación qu'enxerte criterios de xéneru na acción sindical dientro del IV Plan d'Acción Positivo pa les Muyeres del Principáu d'Asturies.