Los Berrones declárense República Independiente

Ayeri pela mañana declaróse la "República
Independiente de Tolivia", llugar qu'acueye l'últimu discu de la
banda de rock "Los Berrones".



Los miembros del grupu,
Ramón, Tante y
Olegario, comentaron ayeri pa la prensa na sede de la SGAE d'Uviéu
cuála ye la filosofía d'esti nuevu cd de "Los
Berrones". Esta filosofía vese bien espeyada nel títulu del
discu, "República Independiente de Tolivia", yá
qu'ellos siguen fíeles al so estilu independientemente del pasu del
tiempu. El diseñu del discu ta basáu na primer páxina de
los comic de los galos Asterix y Obelix. D'esta forma la banda
preséntase, d'una manera cómica, como si fueren una especie
d'aldea que resiste énte los romanos, que nesti casu son la comida
basura, la telebasura y demás "corrientes culturales". Con
esta declaración d'independencia quieren ufiertar un requexu pa toos
aquellos que quieran fuxir d'esta invasión.



No que cinca a la cuestión musical nun vamos topar sorpreses, les
guitarres que vinieron sonando estos últimos 14 años y la voz de
Ramón nun pueden faltar. Sí que topamos delles collaboraciones especiales
como la de la gaita de Jorge Areces y la voz de la cantante de tonada Anabel
Santiago. Como novedá esta ye la primer vez que "Los Berrones"
faen una versión d'un tema, atreviéndose col "Bridge
over troubled water" de
Simon
& Garfunkel. qu'ellos traducen por "Puente
sobre agües braves". Como anécdota, dicir qu'esta versión va sirvir de banda sonora del curtiu "Lo que
el ojo no ve" del escritor asturianu Maxi Rodríguez y que va proyectáse nel Festival de Cine de
Xixón.



Na presentación "Los
Berrones" tamién quixeron comentar que siguen
considerándose una banda marxinada por ciertos sectores. Asina esplicaron que nun entendíen como podíen llevar más de
diez años ensin tocar nes fiestes de San Matéu, o como nes
discográfiques estatales mandábenlos pa la sección
d'internacional por cantar n'asturianu.Con too y con ello "Los Berrones"
siguen cantando en llingua asturiana, y como comentaron a Asturies.com,
l'asturianu ye llingua oficial na "República Independiente de
Tolivia".