Los asesores de la normalización en Xixón denuncien el despreciu del PSOE pa col asturianu

El Conseyu asesor de la Oficina de la Llingua de Xixón, nel que tan presentes asociaciones comprometíes col idioma asturianu y entidaes culturales y sindicales, como Comisiones Obreres, FETE-UXT, Suatea, Xunta pola Defensa de la Llingua o l'Academia de la Llingua, dio esti sábadu una rueda de prensa pa denunciar la paralización de les polítiques de normalización de la llingua dientro del Conceyu de Xixón y, concretamente, l'allancamientu de les ordenances d'usu del asturianu en conceyu.

El documentu de les ordenances, que lleva yá añu y mediu ensin aprobase en Plenu del Conceyu dende que-y lu presentare la Oficina de la Llingua a los trés partíos presentes en conceyu (IX-BA, PP y PSOE) ye la base pola que tendría de mandase l'emplegu del idioma pol gobiernu local y sirvir de marcu a les polítiques de normalización en conceyu. La so redacción y cumplimientu formaben parte de los compromisos políticos ente PSOE y IX-Ba nel so alcuerdu pa facer gobiernu de coalición na Villa de Xovellanos, polo que'l Conseyu Asesor fizo ún llamáu a qu'IX-BA s'asitie públicamente nesta cuestión y adelantó que les organizaciones presentes nel organismu van apertar pelos sos medios sobre l'alcaldía.

Dende'l Conseyu Asesor de la Oficina entiéndese que la non aprobación d'esti documentu supón la muestra más clara del enfotu del PSOE por "paralizar" les polítiques de normalización del asturianu. Berto Cobreros, en nome del Conseyu Asesor, declaró que'l documentu de les ordenances contaba de mano col preste d'IX-BA y tamién el del grupu del PP en conceyu, culpando a l'alcaldesa Paz Fernández Felgueroso de ser la responsable principal de la refuga a la propuesta normalizadora del Conseyu Asesor. Según esplicó'l tamién miembru del sindicatu SUATEA, la refuga al documentu supón una "falta de consideración" al trabayu pola normalización del asturianu que se ta faciendo na Oficina del conceyu , asegurando que "nun pue haber normalización ensin unes ordenances que la regulen". L'artista Ánxel Nava, miembru tamién del Conseyu Asesor, comentó que la falta de seriedá y de compromisu pa col asturianu dende'l Conceyu de Xixón llevó a que se diere'l casu de que nel rexistru del conceyu se-y refugaren testos n'asturianu y a que se-y pidiere que s'espresare en castellanu"