Lo que suelten les térmiques asturianes

Como suelen facer tolos años, la organización ecoloxista "Ecoloxistes n'Acción" ta acabante de presentar un informe sobre la contaminación n'Asturies. Esti informe, que recueye y peñera los datos de los 41 puntos de medición oficiales espardíos pela rodiada de les centrales térmiques del país, aporta conclusiones interesantes sobre l'estáu de latmósfera que nos toca respirar, separtando en cada zona de medición los axentes contaminantes más peligrosos que suelten estes instalaciones industriales, como'l diósidu d'azufre y el diósudu de nitróxeno.

Según l'informe, que se fai a partir de datos de la Conseyería de Mediu Ambiente, toles centrales térmiques asturianes perpasen los topes d'emisión que-yos marca la llexislación europea y les lleis subsidiaries del estáu, apuntando a la térmica de Lada (Llangréu) como la qu'aporta datos más preocupantes, con tres puntos de medición nos que se pasen los valores permitíos, llegando a los 64 µg per m3 de diósidu de nitróxenu nel aire que marcó la estación de Turiellos, cuando'l tope de protección pa la salú humana ta en 40 µg/m3. Pela so parte, la térmica de La Pereda, desarrollada por Hunosa pa quemar los restos de carbón que queden nes vieyes escombreres y preparada p'aceptar combustibles cásique de toa triba, llegó a perpasar delles veces el tope de diósidu d'azufre de 350 µg/m3, con un másimu de 820 µg/m3.