L.lena da un pasu alantre na normalización de la toponimia

La Xunta de Toponimia, presidida por Carlos Madera y cola participación de Ramón d'Andrés aconceyó esta selmana en L.lena, ún de los primeros conceyos en solicitar la revisión oficial de la so toponimia y onde va entamase, en poques selmanes, la colocación de señalización n'asturianu en 22 llugares y parroquies del conceyu, una midida que taba prevista dende va tiempu pero que los responsables del conceyu aplazaron hasta que la Xunta de Toponimia diere'l preste a los topónimos o indicare si yera precisa dalguna modificación.

L.lena, ún de los conceyos más estensos d'Asturies, ye tamién ún de los más activos na defensa del asturianu, siendo ún de los que fundaron la rede asturiana de normalización en conceyos y contando dende va yá más de dos años con oficina denormalización propia, dirixida por Penélope Miranda. Dende febreru d'esti añu L.lena cuenta tamién con unes ordenances d'usu del asturianu que manden, ente otres coses, que tolos bandos y disposiciones que salgan del Ayuntamientu han ser billingües, lo mesmo que les invitaciones, comunicaciones internes y esternes, convocatories a reuniones, rótulos informativos de les instalaciones municipales y toles publicaciones institucionales (revistes, memories, guíes). El Reglamentu pretende tamién promocionar l'usu oral del asturianu por parte de los trabayadores municipales na rellación colos vecinos y nes intervenciones públiques, recoyendo'l compromisu del Conceyu de formar a los trabayadores nesti sentíu.