‘Llegó la hora/Chegóu el hora’, el cantar de la sonrisa frente a los discursos del odiu

|
Xune Elipe en 'Llegó la hora-Chegóu el hora'

Músicos pola Oficialidá compón esti tema, acompañáu de videoclip, p'animar a la participación na manifestación del sábadu.

Xune Elipe presentó esta mañana nel Conseyu de la Mocedá del Principáu d'Asturies ‘Llegó la hora/Chegóu el hora’ nel actu de la Xunta pola Defensa de la Llingua Asturiana (XDLA) pa dar anuncia de los detalles de la histórica cita del sábadu (12 hores, Estación del Norte d’Uviéu) pola oficialidá del asturianu y del gallego-asturiano. “Músicos pola Oficialidá tamos venceyaos dende’l principio a la Xunta pola Defensa de la Llingua Asturiana y la meyor manera de contribuyir ye faciendo lo que meyor sabemos, que ye un cantar”, espresó’l cantante de Dixebra.

El periodista y escritor Francisco ‘Paco’ Álvarez ye l’autor de la lletra, nes dos llingües propies d’Asturies. “Encantónos dende un primer momentu. Buscábamos esi puntu d’emotividá y de fuercia qu’él entendió mui bien, y sincretiza tolo que queríemos espresar. Encaxó perfectamente na idea que teníemos y na música que desarrollábamos”, confesó Elipe.

Sobre la composición, apuntó que “esta ocasión la diferencia ye que nos anteriores cantares de Músicos pola Oficialidá tenía munchu pesu tola parte de programación, de música lletrónica, samplers, muestres de soníu… Trabayábase munchu n’estudiu. Agora inspirónos el logu de la campaña pola oficialidá, que ye un corazón multicolor, porque lo que quiximos foi dexar un poco pa prau tola parte más electrónica, y tolo qu’apaez foi hacia una producción de tipu orgánicu; con esto quiero dicir que too ta tocáu: la batería, el baxu les guitarres, la gaita… Hai muncha combinación amás, d’instrumentos llétricos y acústicos, como la pandereta, gaita, tambor a l’asturiana. ¿Por qué? Porque queríamos tresmitir esa sensación d’humanidá, de corazón… Esa sensación de que somos de verdá, tamos equí tocando, y amás queríemos un cantar muncho más emotivu que los anteriores. Una cosa, con más fuercia”.

Unes carauterístiques que rescamplen nel resultáu final y a lo qu’ayuda a tresmitir el videoclip, con realización de Pablo A. Quiroga. “Frente al anonimatu y el mensaxe del odiu, y de plataformes pantasmes, amuesa cares allegres, de muncha xente, de munchos perfiles, dando la cara. Xuntando un poco esta campaña del corazón cola de ‘Doi la cara’ que tuvo tanto ésitu”, añade.

Instrumentistes y cantantes de diferentes escenes

Participen nel emotivu ‘Llegó la hora/Chegóu el hora’ “persones conocíes de la escena musical asturiana, que pertenecen a campos distintos como’l rock, del folk, música tradicional, hip hop, del pop…, que nos quiximos xuntar pa facer dalgo mui coleutivo. Toos al mesmu tiempu, dándose combinaciones mui llamatives, mui orixinales, como un voz rapiada enriba d’una percusión tradicional sobre tambor asturianu”. La llista compónla Maxi Compán (voz, guitarres y composición musical), Isra Sánchez (batería), Luis Melero (baxu), Sergio Díaz (baxu y guitarres), Rubén Bada (guitarra), Javi Tejedor (gaita, acordión, tambor y pandereta), Lluci Palomares (voz), Pablo Martínez (voz), Silvia Quesada (voz), Leticia Baselgas (voz y pandereta) y Shalom (voz rapiao), amás del propiu Elipe (voz y ideólogu), con producción musical del tamién téunicu de soníu Sergio Díaz y versión en gallego-asturiano de la lletra a cargu de Xosé Miguel Suárez Fernández ‘Tapia’.

LLETRA DE 'LLEGÓ LA HORA / CHEGÓU EL HORA'

Soi nieta d'esta tierra, soi fía d'esta llingua,
soi hermana del tiempu y de la dignidá.
Soi palabra, soi música, soi verbu, soi acentu,
soi pasáu y futuru, soi suañu y llibertá.

Soi dueña de mi mesma, nada-y debo al silenciu,
al mieu, a la inorancia, al odiu, a la vergoña,
a quien nun fueron a esborrar la memoria
de diez lletres que forxen el mio nome.

¡Yá, yá, yá! ¡Oficialidá! Llegó'l momentu, llegó la hora, nun vengo sola, vengo col pueblu. ¡Oficialidá!
Llegó'l momentu, llegó la hora, yá toi nes puertes del Parllamentu.
¡Oficialidá!

Soi neta d’esta terra, soi fiya d'esta llingua,
soi irmá del tempo y da dignidá.
Soi palabra, soi música, soi verbo, soi acento,
soi pasao y futuro, soi soño y llibertá.

 
Soi tu cada día que traten d’humildate
por falar esti son fechu cola alcordanza,
por vivir nun idioma que medra a cada instante,
por creer nuna llingua na que nun sobra naide.
 
¡Xa, xa, xa, oficialidá!
Chegóu el momento, chegóu el hora, nun veño sola, veño cua xente.
 
Porque nun quiero que'l mio fíu tenga mieu de falar. ¡Oficialidá!
 
Es eu condo berras el meu nome,
soi tu condo garras a pancarta.
Es eu condo cres na nosa causa,
soi tu condo entonas el meu nome.
 
Soi tu cada día que tenten d'humillarte
por falar este son feito col acordanza,
por vivir nun idioma que medra a cada instante,
por crer núa llingua na que nun sobra naide.

¡Xa, xa, xa! ¡Oficialidá!

Chegóu el momento, chegóu el hora, nun veño sola, veño cua xente.
Chegóu el momento, chegóu el hora, xa tou nas portas del Parlamento.
¡Yá, yá, yá! ¡Oficialidá!
Contador Estadistiques