Llegalízase'l matrimoniu ente persones del mesmu sexu

La llegalización definitiva de los matrimonios ente persones del mesmu sexu yá ye una realidá. L'últimu Conseyu de Ministros del 2004 aprebaba la reforma del códigu penal que permite'l casamientu ente lesbianes y homosexuales, una midida que'l colectivu Xente Gai Astur (XEGA) recibe con allegría. Según XEGA esti ye "ún de los escalones últimos pa llegar a la equiparación llegal en cuantes a derechos de los nuestros colectivos" y califica'l reconocimientu de "fechu históricu".

En comunicáu de prensa, Xega felicita al gobiernu del PSOE por nun ceder énte les presiones "de los sectores más reaccionarios y homófobos de la sociedá" y carga contra la Ilesia Católica, opuesta a la reivindicación del matrimoniu homosexual y a la qu'acusa de "aneciar en negar la fondura de los cambeos sociales y de mentalidá que se dieron na sociedá de va unos años p'acá". La organización de defensa de los derechos d'homosexuales y lesbianes cuenta con qu'esti añu 2005seya "añu de la igualdá" y recuerda que'l reconocimientu a los sos derechos nun supón una mengua de los derechos de los demás.