Llechi ecolóxico asturiano nos supermercaos

La compañía Carrefour llegó a un alcuerdu cola productora francesa Lactalis pa distribuyir más de 200.000 llitros de llechi ecolóxico en tol territoriu del Estáu, que va salir al mercáu baxo la marca Carrefour Eco. Parte d'esti llechi va salir de dos ganaderíes asturianes certificaes pol Conseyu de la Producción Ecolóxico , que van vende-y llechi ecolóxico al xigante comercial, xunta llechi de catorce ganaderíes de Galicia, país onde'l sector de la ganadería y agricultura ecolóxiques ta enforma más desarrolláu que n'Asturies.

L´agricultura y ganadería ecolóxiques tan garrando bien d´interés ente una parte de los consumidores, de ciertu nivel alquisitivu y que van cocienciándose sobre la meyor calidá d'estos productos. La crisis de les vaques lloques y otros escándalos alimentarios collaboraron enforma a que rescamplare la imaxe d'estosalimentos "verdes" creando-yos una imaxe y un nichu de mercáu en que les grandes superficies ven tamién agora oportunidá de negociu. L´agricultura ecolóxico nun gasta pesticides, nin herbicides, nun emplega técniques de cambéu xenéticu nin tien a los animales trancaos en cuadres masificaes, y amás de ser repetuosos col mediu ambiente los productos ecolóxicos demustren agora que puen ser rentables.