Llangréu va entamar una campaña p'afalar a los comerciantes al usu del asturianu

Ramón d´Andrés, Director de la Oficina de Política Llingüística del Principáu d´Asturies, visitó ayeri xueves el Conceyu de Llangréu. Esta visita enmárcase dientro de la xira que ta faciendo'l Director pelos conceyos asturianos que cuente con servicios de normalización col envís de roblar convenios de collaboración que potencien la promoción y normalización del usu de la llingua.

Luis Bada, Conceyal Delegáu de Política Llingüística del Conceyu de Llangréu y Ramón d´Andrés caltuvieron un entrevista na qu´estudiaron eses posibles llinies de cooperación ente´l Principáu d´Asturies y el Conceyu de Llangréu. Nesta entrevista falóse de les posibles canales de financiación de proyectos concretos de normalización social de la Llingua Asturiana nel Conceyu que tán entovía en fase d'estudiu pero que s'empobinen toos a la consecución efectiva d´una dignificación social del usu de la Llingua Asturiana.

Ente los temes que se trataron nesta entrevista destacaron l'estudiu de les Ordenances Municipales d'usu del asturianu nel Conceyu y l'entamu d´una campaña, financiada pola Conseyería de Cultura, p'afalar a los comerciantes locales nel usu del asturianu nos sos negocios, amás de potenciar midíes que yá son un fechu na vida pública de Llangréu, casu de los Cursos de Formación en Llingua Asturiana p'Adultos y funcionarios, la política de billingüismu na publicidá Institucional ya Impresos del Conceyu, Recuperación Toponímica, Rotulación de Dependencies Municipales, Continua Ufierta Cultural en Llingua Asturiana, etc).