L’IRPF nel móvil

Nun intentu de facilita-yos a los contribuyentes el pagu d'impuestos, l'Axencia Tributaria del Estáu ta acabante de dar anuncia d'un novedosu sistema pa poder pagar l'impuestu de la Renta al traviés del móvil. Asina los contribuyentes namás van tener que facer que da-y el preste al borrador previu que-yos mande l'Axencia Tributaria al móvil nun SMS. Pa poder furrular con esti sistema hai que solicitalu enantes del ún de Marzu per teléfonu, internet o pidiéndolo na mesma oficina de l'Axencia Tributaria.

Sicasí, estos servicios telemáticos nun valen pa tolos contribuyentes yá que namás pueden usalos aquellos contribuyentes que tengan solo rindimientos del trabayu y de capital mobiliariu suxetu a retención o ingresu en cuenta. Tamién tan incluyíos los contribuyentes con Lletres del Tesoru, rentes inmobiliaries que tean orixinaes en non más de dos inmuebles, ganancies patrimoniales sometíes a retención o ingresos y sovenciones a la vivienda habitual. Según l'Axencia Tributaria son cerca de 6 millones de contribuyentes los que puen acceder a esti sistema.

Xunta esta posibilidá tamién se pue pagar l'IRPF al traviés d'Internet. L'Axencia Tributaria nun ye la primera qu'entama un sistema asina, ya que países como Suecia yá tienen desarrolláu un sistema de pagu via sms asemeyáu. El casu ye que'l sistema recaudatoriu ye'l que más ta aprovechando les nueves tecnoloxíes mentanto qu'otros servicios públicos como la educación o los servicios sociales tienen un retrasu tecnolóxicu perimportante. Nel Estáu l'usu del móvil ye mui altu y esti ye un intentu más p'allegar l'Alministración a los ciudadanos, anque nesti casu va ser pa munchos usuarios un sms non deseáu.