L'Ibex espoxiga col calor

El cambéu de tendencia nos mercaos bursátiles yá ye una realidá. L´Ibex sigue col rally alcista y marcó la selmana pasada otru másimu anual. Nos mercaos internacionales manda la prudencia énte unes perspectives económiques estraes de duldes. L´Ibex asistióse'l vienres nos 7.081,60 puntos lo que supón una xuba al pieslle selmanal del 2,5%, medrando nel conxuntu la selmana un 3,2%.



Les bolses del Vieyu Continente pesllaron la selmana con probetayes xubes: Francfort, Llondres y París nun pasaben del 1% positivu. La selmana tampoco nun pintó bien pa los mercaos norteamericanos, onde´l xueves pasáu Wall Street tuvo la mayor cayida del mes. L´índiz tecnolóxicu Nasdaq y el Dow Jones nun tuvieron avances nuna selmana onde los inversores d´Estos Xuníos tan a la gueta d´una baxada de tipos de la Reserva Federal. Xunta esti mal andar de les bolses internacionales, los permalos datos estadísticos d´Alemaña y Francia tampoco nun dieron itiu p'alegríes. L'índiz de producción del país xermánicu foi d´un 0,3 negativu, una décima penriba les previsiones de los analistes. Per otru lláu, Francia dio anuncia d´una revisión a la baxa del crecimientu económicu colo que s'asisitia nel nivel más baxu de va diez años. Sólo el vencimientu de futuros sofitó les escases ganancies del pieslle selmanal n´Europa, mientres que, a la contra, solo la Bolsa de Madrid tuvo xubes perimportantes.



El capital estranxero entró con fuercia'l vienres nel parqué madrilanu, y los brokers internacionales dieron anuncia de compres de valores a lo llargu del tol díi. Les males llingües dicen que les fuertes xubes del vienres salieron del error d´un broker que dio anuncia de compra d´un paxu perimportante de valores cuando lo que tenia que facer en realidá yera vendelu. Esti enquivocu despistó a dellos inversores y entamó un rally alcista que llevó a un nuevu másimu anual. Nun ye la primer vegada que la enquivocación d´un broker de bolsa baltia'l mercáu. Ya l'añu pasáu nuna subasta de drechos d´un valor un broker madrileñu ufiertó por unos drechos 100 veces más de lo que valien por marcar mal los números nel tecláu.

TPI, del Grupu Telefónica, foi el valor más beneficiáu de les xubes del pieslle de la selmana pasada con una xuba del 5,6%. El vienres pasáu trancaron penriba´l 4,5% Abertis, Zeltia y Gamesa. La biotecnolóxica gallega Zeltia ta xorreciendo gracies a les bones perspectives del estudiu del so futuru medicamentu pal cancer d´ovariu Yondelis. Otramiente, BBVA y SCH tuvieron perimportantes xubes del 4,2% y 3,6% respectivamente. La xuba de los dos grandes bancos choca en comparanza cola crisis de les sos inversiones n´Arxentina. Nel lláu de les perdes destaquen Acerinox, Metrovacesa y Dragados, mientre que'l robu del añu siguió p'alantre al dar la CNMV via llibre al espoliu de los accionistes de Terra por parte de Telefónica. L´Ibex, que se caltién penriba de los 7.000 puntos, marca yá más d´un mes de tonu alcista. L´índiz xeneral de la Bolsa de Madrid asitióse nos 737,32 con una xuba selmanal del 2,93%, mentantu l´índiz tecnolóxicu Nuevu Mercáu 1.872,3 puntos.

L´oru prieto pieslló la selmana pasada nos 26,93 dólares (xuba del 2.5%). Los analistes yá falen d´un recorte de la producción de petróleu na reunión de la OPEP del mes qu'entra. Selmana estable nel mercáu de renta fixo onde los bonos nun sofrieron cambios. L´euru nun tuvo bona selmana, ello en parte pol prósimu recorte de tipos d´interés al otru lláu del Atlánticu, y la moneda europea quedó en 1,1613 dólares. Anque munchos inversores tovía siguen fuera de los mercaos bursátiles españoles, el volume de negociu continúa medrando na Bolsa de Madrid. Pero esto puede quedar nuna nuechi de veranu si los mercaos internacionales nun entamen unes xubes llibres de les duldes económiques d´anguaño.