L’Hostelcur Xixón robla una gran temporada col títulu de Lliga

Tres dos subcampeonatos, na Copa d’Europa y na estatal, l’Hostelcur Xixón por fin tuvo recompensa a la so escelente temporada llevándose la OK Lliga de ḥoquei patinos a falta de dos xornaes. La fin de selmana tamién dexó’l descensu del Sporting a Segunda División pese a ganar n’Ipurua al Eibar (0-1).

El trunfu’l sábadu nel pabellón de Mata-Xove sobre’l CHP Bigues i Riells por 5-1 sirvió a les xixoneses p’algamar la so segunda OK Lliga, tres la consiguida na temporada 2008-2009. Nesta ocasión, l’Hostelcur fíxolo con una tarxeta impecable, al sumar 21 victories y 3 empates nos 24 partíos disputaos hasta la fecha.

D’esta forma, les moces de María Fernández Grande 'Pulgui' quiten la espina de les dos finales perdíes esta temporada col CP Voltregà, segundu clasificáu con 56 puntos, a diez del conxuntu xixonés, que tien un partíu más disputáu. Esta segunda OK Lliga fai que l’equipu presidíu por Xuan Ramón Naves s’afite como’l club asturianu con un meyor palmarés, yá que tamién cuenta con 4 Copes d’Europa y 3 de la Reina.

Victoria con descensu

El Sporting fixo los deberes ayeri n’Ipurua nun bon partíu de los de Rubi pese a unos malos primeros minutos. Burgui anotó nel minutu 32, tres una bona asistencia de Moi Gómez, el tantu roxiblancu que, nesi momentu, daba opciones de permanencia al cuadru xixonés al dir ganando l’Athletic Club 1-0 al Leganés.

Pese a que l’Eibar tuvo ocasiones, les más clares foron les sportinguistes, sobre manera un remate de Cop en boca de gol a centru de Sergio dende la derecha que salió desviada por poco. Sicasí, el tantu d’Alexander Szymanowsky en San Mamés nel minutu 61 condenaba a los roxiblancos.

Un disparu al palu del futbolista xixonés Cristian Rivera nel minutu 74 foi l’únicu sustu que tuvo una ayeri segura defensa sportinguista. Sicasí, el silenciu de la esquina visitante y del restu d’afición asturiana repartida per too Ipurua, facía saber a los xugadores el desenllaz final de la tarde: l’empate del Leganés en Bilbao y del Deportivo nel Estadio de la Cerámica dexaben al Sporting ensin opciones de permanencia a falta d’una xornada pal final.

El descensu roxiblancu provocó cambios nel horariu de dicha xornada por parte de LaLiga. El Sporting-Betis caltién la hora (17, El Molinón), mentes que’l Leganés-Alavés y el Deportivo-Las Palmas pasen a disputase a les 19 hores.

Sortéu pal ascensu a Segunda B

La única allegría que podría llevase esta temporada l’afición del Sporting, a parte del bon aniciu del xuvenil en Copa (1-1 na ida contra’l Barcelona en partíu disputáu en Catalunya), ye la del so filial, que ta a un pasu de recuperar plaza en Segunda División B tres proclamase campeón del grupu asturianu de Tercera. Esta tarde, a les 17 hores, va conocer al so rival na eliminatoria única que da l’ascensu al ganador y el pase a la repesca al perdedor.

Nel bombu del sortéu de Las Rozas van tar tamién presentes l’Avilés (segundu clasificáu), l’UP Langreo (terceru) y el CD Tuilla (cuartu). Descienden de categoría, el CD Tineo, la SD Lenense y l’Urraca, mentes que yá confirmaron el so ascensu dende preferente’l Roces y l’UD Gijón Industrial.

Otra manera, la Segunda División B va contar como mínimo con dos equipos asturianos la temporada próxima tres la gran campaña del Lealtad y el trunfu ayeri del Caudal sobre’l Pontevedra por 2-1, col que certificó la permanencia nel añu del so retornu a la categoría.

Remontada del Unión Financiera

Nel play-off d’ascensu a ACB, l’Unión Financiera Baloncesto Oviedo logró’l pase a semifinales tres recuperase de la derrota nel primer partíu disputáu en Pumarín y ganar los dos choques n’Ourense, el primeru d’ellos con una exhibición defensiva al dexar a los gallegos en 39 puntos. El siguiente rival de los uvieínos va ser el ganador del Quesos Cerrato Palencia y el Leyma Coruña, que van al alcuentru partíu de la serie.

Semeya del Patronatu Deportivu Municipal de Xixón.