L'Hespérides, baxo sospecha

El barcu de investigación oceanográfico de l'Armada Española Hespérides ta acabante d'entrar al Puertu d'El Musel de Xixón no que ye la primer visita del famosu barcu d'investigación a agües asturianes. Sicasí, la llegada del Hespérides faise nun ambiente calentáu pola acusación del CEPESMA (Coordinadora pal Estudiu y Protección de les especies Marines) que diz que los esperimentos del Hespérides tan tres de l'apaición de tres calamares xigantes (de ente 68 y 140 kilos) muertos a lo llargo de la selmana.

La quexa del Cepesma, qu'amenaza con demandar a los responsables de la campaña del Hespérides, encóntase en que los trabayos de sondéu del barcu inclúin l'unviu masivu d'ondes que provoquen cambeos de presión que puen alloriar a los calamares xigantes, que viven a grandes profundidaes, llegando a matalos al xubir a flote y sofrir una fuerte descompresión. Ello ye que los aparatos del Hespérides, nomaos "skrimers" o "skrakers" faen españar unes burbuxes d'aire comprimío, rebotando la onda espansiva en fondu la mar y devolviéndo-yla al barcu, que saca asina mapes del fondu marinu. Al dicir del director del CEPESMA, Luis Laria,los españíos tan dañando a los calamares xigantes, pero tamién a más especies que nun tan evaluándose.
Laria dixo tamién que nel añu 2001, otros barcos d'esploración de la mesma triba del Hespérides contrataos por una compañía de Noruega fixeron un dañu asemeyáu, matando cinco calamares xigantes. Laria denunció que l'oxetivu del barcu nun ye namás científicu, y que tres d'esta campaña d'investigación tan tamién intereses empresariales qu'anden a la gueta de recursos enerxéticos. Nel barcu van científicos del Institutu Francés del Petróleu y del Ente Vascu d'Enerxía

El barcu llegó a Asturies dientro de la campaña del Proyectu "Reconocimientu Xeolóxicu y Xeofísicu del Marxe Continental Noribéricu: Estudiu Integráude les Cuenques Sedimentaries y Evolución Xeodinámica del Golfu de Vizcaya y la Cordillera Pirenáico-Cantábrica" (MARCONI), proyectu financiáu pola Universidá d'Uviéu, CSIC, Ministeriu de Ciencia y Tcnoloxía y la Universidá de Barcelona.