L’euru sigue perdiendo posiciones

Les cotizaciones nos mercaos internacionales la selmana pasada foron febles poles duldes de los inversores, pola inestabilidá xeopolítica na ocupación d'Iraq y polos malos datos estadísticos d'Estaos Xuníos. L'euru sigue perdiendo posiciones a favor d'un dólar que va tiempu que tocó fondu.

Ente les estadístiques de la selmana destaquen les del otru llau del Atlánticu: el resultáu de nueves construcciones foi de 1.946.000, meyor de lo esperao, la producción industrial tuvo un datu mui negativu con cayida del -0,2% y l'índiz de confianza de la Universidá de Michigan algamó los 93,2 puntos mui perbaxo de los 97 pronosticaos.

Nel Vieyu Continente'l datu del PIB foi del 0,3% mentanto que la tasa de paru nel Reinu Xuníu foi del esperáu 2,9%.

Les bolses europees tuvieron una selmana de menos a más. La volatilidá de los mercaos europeos conocióse sobremanera en places como la de Francfort. Los malos datos d'Estaos Xuníos y la inestabilidá n'Oriente Mediu y d'Iraq tamién influyeron sobre la comunidá inversora europea. El pieslle en Wall Street foi mistu: l'índiz tecnolóxicu Nasdaq trancó nos 1.995,74 puntos con una cayida del 0,32%. Meyor foi'l pieslle del Dow Jones qu'algamó 10.451,97 puntos (+0,52%).

El volume de negociu sigue altu nel parqué madrileñu, penriba los 2.000 millones d'euros negociaos. L'Ibex tuvo un pieslle en positivo la selmana pasada hasta los 8.387,90 puntos lo que supón una xuba de cerca de mediu puntu. Pela bolsa madrileña tiren los blue chips col BBVA, SCH, Endesa y Repsol YPF en cabeza. La estrella de la selmana foi Sogecable que meyoró resultaos d'ingresos. Valores con ganancies foron tamién Altadis, Antena3 y Gamesa. De toles formes los chicharros caltienen unes revalorizaciones perimportantes y los inversores anden tres de valores con altos dividendos y estabilidá a mediu plazu.

Nel mercáu de divises l'euru trancó la nos 1,2040 dólares, lloñe d'aquellos 1,25 dólares unidá gracies a la meyor evolución de la economía norteamericana y tamién porque la divisa de la primer economía del mundu tocare fondu. Asina con esti repunte técnicu del dólar los esportadores europeos ven con esperances una recuperación del comerciu esterior na zona. Nel mercáu de renta fixo, importantes xubes nos bonos como demuestra'l bund alemán que yá tien una rentabilidá del 4,12%. L'anuncia de la selmana foi la dimisión del presidente del Bundesbank Ernst Welteke pol supuestu sobornu d'una entidá financiera alemana. De toles maneres la so dimisión nun afectó sobremanera a los mercaos.

El petroleu sigue col mieu d'una sobredemanda. L'empeoramientu de la situación en tarrén iraquino pon difícil la esportación de crudu d'esi país mentanto que los países de la OPEP nun van aumentar la producción como pa tornar a precios d'estabilidá. Asina'l preciu del barril Brent algamó los 33,65 dólares. Otramiente, l'oru, dempués de delles selmanes de blincos caltién la cotización una migaya penriba de los 400 dólares onza.