L'euru entama a menguar

Los mercaos internacionales nun tuvieron una bona selmana, y les cayíes de les principales bolses mundiales foron bultables. La inestabilidá xeopolítico pola ocupación d'Iraq xunta l'altu preciu del petroleu ponen series duldes sobre'l futuru económicu inmediatu. Solo l'últimu día de la selmana foi positivu nos mercaos énte les anuncies de bonos resultaos empresariales de delles multinacionales. Otramiente, l'Ibex-35 caltién la base de los 8.000 puntos.

El meyor datu de la selmana pasada foi la estadística de pidíos de bienes duraderos nos Estaos Xuníos: + 3,4% mentanto los analistes contaben col 0,7%. Nel Vieyu Continente les ventes minoristes nel Reinu Xuníu medraron el 0,6%, meyor de lo esperao. Tamién se dio anuncia del PIB del Reinu Xuníu que medró un 0,6%, una décima perbaxo de les previsiones oficiales. L'índiz de confianza del consumidor n'Italia foi de 101,7 puntos, meyor de lo esperao. Pero'l gran datu empresarial foi'l del xigante Microsoft qu'algamó unos resultaos mui positivos y con traza de siguir medrando.

Les bolses europees siguieron mui de cerca la evolución de Wall Street. La selmana pasada foi bien probe en resultaos. Sólo'l vienres hebo xubes xeneralizaes nos mercaos gracies a les bones anuncies de los Estaos Xuníos. Llondres tuvo un pieslle en negativo mentanto que París y Francfort algamaron resultaos positivos pero probes. Wall Street tuvo una mala selmana sacantes el vienres y l'índiz Dow Jones algamó los 10.472,84 puntos mentanto que'l tecnolóxicu Nasdaq llegó a los 2.049,77.

Selmana en negativo pal Ibex con pieslle nos 8.331,70 puntos y cayida selmanal del 0,67%. Solo foi positivo'l volume de negociu, qu'algamó los 2.204,6 millones d'euros, una cifra bien curiosa que diz muncho del apueste de los inversores pola renta variable. Les xubes foron p'Acerinox y Arcelor ente'l ruxe-rux d'operaciones corporatives. Tamién tuvieron pieslle en positivo los valores Prisa (mui favorecíu pol nuevu gobiernu socialista), Endesa, Telefónica, Repsol, SCH y BBVA. La constructora FCC foi la más castigada polos inversores con una cayida alrodiu'l 2%. Pero la comunidá inversora ta pendiente de la primer OPV d'esti añu: FADESA. La constructora gallega yá tien cubierta la venta d'acciones nel tramu minorista y tamién nel tramu institucional. Anque según dellos analistes el preciu penriba los 1.200 millones d'euros nel que valoren los propietarios la empresa ye esaxeráu la especulación y les ganes de papel nuevo que tien el mercáu puen asegurar l'ésitu de la operación. Esta ye la primer OPV del añu anque paez que nun va ser la única yá que quieren salir a cotizar al parqué Vocento (editora d'El Comercio), Telecinco, Probita Pharma, ONO y dalguna más por confirmar. Pero l'anuncia de la selmana ye ensin dulda'l nome del futuru director xerente del FMI, cargu que va dir pa Rodrigo Rato. Anguaño ye l'únicu candidatu y tien el sofitu de prácticamente tolos países. L'exministru d'Economía va tener un bon retiru con sueldu añal llibre d'impuestos de 1,5 millones d'euros, rangu de presidente d'Estáu, inmunidá diplomático en tolos países y un retiru en dexando'l cargu de más de 6.000 euros al mes.

Nes materies, la crisis d'Iraq, la inestabilidá en Venezuela, les probetayes reserves de la compañía Shell y la posición de la OPEP caltienen unos precios del petroleu mui altos y mui peligrosos que puede afectar sobremanera al xorrecimientu económicu de la mayoría de los países. Especialmente n'Europa que cola xuba del petroleu y la baxada del euru va ver xubir el preciu de la gasolina en tiempu real. La selmana pasada'l preciu del oru prieto trancó nos 33,35 dólares barril.

Nel mercáu de renta fixo tuvo una selmana a la baxa como bien diz el bonu de referencia, el bund alemán, qu'algamó una cotización del 4,18%. Mentanto, nel mercáu de divises la volatilidá ye mui alta. Dende organismos como'l Bancu Mundial ta dándose anuncia de la necesidá d'una baxada de tipos na Zona Euru y d'una xuba nos Estaos Xuníos. Nesta llinia'l presidente de la Reserva Federal de los Estaos Xuníos, Alan Greenspan, yá ta preparando los mercaos pa una xuba de tipos pal branu mientres l'euru baxa hasta los 1,18 dólares unidá.