Les XLI Xornaes Internacionales d’Estudiu de l'ALLA van celebrase del 7 al 9 de payares

L’Academia de la Llingua Asturiana (ALLA) ta acabante d’abrir la inscripción pa les XLI Xornaes Internacionales d’Estudiu. Éstes van celebrase del 7 al 9 de payares nel Edificiu Alministrativu de la Facultá de Filosofía y Lletres de la Universidá d’Uviéu con presencia d’espertos d’universidaes d’Austria, Canarias, Madrid, Catalunya o Andalucía.

L’entamu institucional de les les xornaes va tener llugar a les 12 hores del martes 7 de payares, pa siguir cola presentación de los númberos 129 de ‘Lletres Asturianes’ y 13 de ‘Ciencies. Cartafueyos Asturianos de Ciencia y Teunoloxía’. Franz Rainer, de la Wirtschafts Universität Wien, va poner la primer conferencia a les 13 hores, entitulada ‘El desarrollo de los sufijos latinos -ĬCIUS e -ĪCIUS en las lenguas románicas’.

Pela tarde l’actividá va arrancar a les 16 hores cola intervención ‘Los premios literarios como agente normalizador de la novela criminal en las literaturas minorizadas’, a cargu de Javier Rivero, de la Universidad de la Laguna. Llueu van poner comunicaciones Iris Díaz Trancho, sobre la ‘Tresmisión interxeneracional del asturianu: estudiu de casu nel conceyu de Piloña’; Andrés Fernández Menéndez, al rodiu ‘Lo maraviyoso y lo sobrenatural: sobro la fantasía asturiana contemporánea’; Lucas Vega, de ‘La lliteratura en ‘fala’ en el primer tercio del siglo XX: un análisis comparativo de dos periódicos’; y Sergio Buelga, que presenta una ‘Propuesta categorial pa la determinación teatrolóxica del corpus d’obres del teatru popular asturianu’.

Depués d’una posa, va siguir l’actividá a les 18.20 hores cola presentación de ‘Equí siguimos: audiovisual de ‘La mio vida ye una novela’’ por Paquita Suárez-Coalla. Va pesllar esti primer día la conferencia ‘El llugar de la lliteratura n’asturianu: una cuestión d’ética y lliteratura’, a cargu de Raquel Fernández-Menéndez, de la Universidad de Alcalá.

Presentación de novedaes editoriales de la Secretaría Llingüística del Navia-Eo

El miércoles 8 y el xueves 9 l’actividá va desendolcase namás pela tarde. Asina, na segunda xornada Wendy Elvira-García, de la Universitat de Barcelona, va falar a les 16 hores de la ‘Comparacion acústica de los sistemas vocálicos del asturiano y el español de Asturias en hablantes bilingües’, y Toribio Fuente, de la Universidá d’Uviéu, darréu de ‘La hidrotoponimia leonesa: los nombres de los ríos, arroyos y otros cursos de agua’.

A les 18.20 hores, depués d’una posa, van presentase les novedaes editoriales de la Secretaría Llingüística del Navia-Eo de l’ALLA. Mentes, va finar el día cola conferencia ‘Encuentro de lenguas en la toponimia menor del siglo XVI en los confines de Senabria’, de Pascual Riesco, de la Universida de Sevilla.

L’últimu día, tamién a les 16 hores, Avelino Corral, de la Universidad Autónoma de Madrid, va abrir l’actividá cola ponencia ‘Estudiu comparativu del suxuntivu n’asturianu y castellán’. Nesta xornada va haber cuatro comunicaciones: ‘Análisis de la xurisprudencia sobra la llingua asturiana’, de Nicolás Bartolomé; ‘De ‘por embargu’ a ‘sin embargu’, origen lingüístico de dos marcadores discursivos en asturiano y castellano’, d’Emilio Fernández Viejo; ‘‘Mando que yo den’: una contribución al estudiu de los pronomes personales del asturianu medieval’, de Clara Elena Prieto; y ‘Plurillingüismu nel ‘Vocabulario de las palabras y frases bables...’’, de Darío de Dios.

Va poner el ramu a les XLI Xornaes Internacionales d’Estudiu a les 18.20 hores, llueu d’una posa, Pedro Riesco, de la Universidá d’Uviéu, cola conferencia ‘El reló, la campana y el tirotéu. Notes semántiques, pragmátiques y sociollingüístiques sobre’l verbu ‘sentir’’. El pieslle oficial va facese a les 19.20 hores.

La entrada a les conferencies ye llibre, pero les persones matriculaes van recibir un certificáu acreitativu d’asistencia. El trámite, con un pagu de 20 euros, pue facese al traviés d’esti enllaz.

Na imaxe, cartelu en formatu horizontal de les XLI Xornaes Internacionales d’Estudiu, diseñu del que s'encargó Nacho Arbesú.