Les ventes minoristes medraron n’Asturies un 10,6%

Nel pasáu mes d'avientu, el pequeñu comerciu asturianu vio xubir les ventes un 10,6%, un tantu per cientu penriba la media del Estáu, que foi del 7% de xuba según l'Institutu Nacional d'Estadística (INE). De fechu Asturies foi la comunidá onde más medraron les ventes minoristes. Xunta Asturies Estremadura y Navarra tuvieron un resultáu penriba la media estatal. Nes grandes superficies el xorrecimientu interanual foi del 11,6%.

L'índiz d'ocupación nel pequeñu comerciu tuvo una variación interanual nel cuartu trimestre del 2003 del 2,9%. Nel mesmu periodu, les grandes superficies tuvieron una tasa del 8,1%. La xuba del negociu nun se correspuende cola creación d'emplegu nel sector minorista, que na media estatal foi del 2,9% mentanto que n'Asturies solo medró la creación de puestos de trabayu un probetayu 0,4%. Nel casu d'Asturies el pequeñu comerciu ta atacáu pola competencia de les grandes superficies, siendo Asturies la comunidá con más presencia de centros comerciales por habitante, lo qu'emburria al pieslle de los pequeños comerciantes.