Les semifinales de la Copa Federación van ser a partíu únicu

Santa Cruz va acoyer estos enfrentamientos y la final de la competición, que yá sortió la fase de grupos y va comenzar el día 31.

El Centru Municipal Integráu Atenéu de La Calzada acoyó esta mañana la ceremonia na que se conoció la composición de la primer fase de la Copa Federación. Doce equipos, ente los que per primer vegada nun taben los filiales o clubes venceyaos, tuvieron nel bombu.

El sortéu colocó nel grupu 1 al Llanes, Mosconia y Avilés; nel 2, al Llanera, L'Entregu y Colunga; nel 3 al Caudal, Condal y EI San Martín; y nel 4, al CD Covadonga, CD Tuilla y UC Ceares. El campeón de caún va pasar a les semifinales (1 contra'l 2 y 3 contra'l 4), cola novedá de qu'éstes van ser a partíu únicu en Santa Cruz, campu que tamién va acoyer la final con motivu del cicuentenu aniversariu del UD Gijón Industrial.

La primer fecha de competición va ser el miércoles 31, colos partíos Llanes-Avilés, Llanera-Colunga, Caudal-Samartín y Cova-Ciares, mentes que les xornaes siguientes van disputase los domingos y miércoles siguientes, siendo la última'l 18 d'agostu. Les semifinales tán previstes pal 3 y 4 de setiembre, y la final pal 11.

Pase a la Copa del Rei pela fase estatal

El ganador de la fase asturiana va pasar a la estatal, na que los cuatro semifinalistes van ganar plaza pa la novedosa Copa del Rei que comienza n'avientu, lo que provoca los cambios nes semifinales y l'adelantu d'estes eliminatories y la final. Los equipos van poder facer siete cambios per partíu en trés interrupciones, cola única esceición de la final de Santa Cruz.

Na imaxe, un momentu del sortéu d'esta edición de la Copa Federación. Semeya propiedá de la Real Federación del Fútbol del Principáu d'Asturies.