Les pruebes de certificación de Llingua Asturiana van repetir nivel B2 y C1 na seronda

El miércoles va abrise’l plazu de matriculación pa les pruebes de certificación de Llingua Asturiana del 2023 adaptaes al Marcu Común Européu de Referencia pa les Llingües. La Conseyería d’Educación repite los dos únicos niveles esaminaos hasta la fecha, l’intermediu B2 y l’avanzáu C1 –el más altu–, que programa pa setiembre y ochobre.

Va ser ésta la cuarta convocatoria d’esti esame pol que yá pasaron más de 1.000 persones p’amosar los sos conocimientos d’asturianu. La primera foi nel 2020, con una única prueba de B2 que tuvo cuasi 800 solicitantes pa 500 places disponibles, mentes que nel 2021 s’amplió cola primera del C1 y más demanda qu’ufierta pa la de B2, nesta ocasión con 300 como tope.

L’añu pasáu caltuviéronse eses 300 de cupu d’almisión y, anque nun s’especifique na convocatoria actual, nesta ocasión nun va haber una llende al considerar que se pueden atender toles inscripciones. Tampoco nun s’afita la sede de los esámenes, que se vinieron celebrando esti tiempu n’Uviéu.

Les persones que quieran certificar la so competencia en Llingua Asturiana esti 2023 tienen del miércoles al 12 de mayu pa formalizar la matrícula nos institutos Aramo (Uviéu), Calderón de la Barca (Xixón), Carreño Miranda (Avilés) y Bernaldo de Quirós (Mieres). El 23 de mayu van espublizase les llistes provisionales d’almitíos.

Les pruebes escrites tán programaes pal sábadu 30 de setiembre en convocatoria única, mentes que les orales van ser a partir del 9 d’ochobre por orde alfábeticu. Les tases d’esame son de 31,63 euros y pa ser declaráu aptu l’aspirante ha aprobar les cinco partes y tener una media superior a 6: producción y coproducción de testos escritos, comprensión de testos orales, comprensión de testos escritos, producción y coproducción de testos orales, y mediación.

Na semeya, momentos previos al entamu de les pruebes escrites de nivel C1 celebraes el setiembre pasáu na Facultá de Formación del Profesoráu y Educación de la Universidá d’Uviéu.