Les parroquies de Xixón protesten pol nuevu PXOU

19 asociaciones de la zona rural de Xixón entamen esta mañana una 'marcha verde' que va salir a les 11 dende distintos llugares del conceyu pa marchar sobre la ciudá en protesta pola reforma del Plan Xeneral d'Ordenación Urbana. El PXOU nuevu, que l'Ayuntamientu va aprebar d'equí a poques selmanes, va trespasar la llende de la Ronda Sur, carretera de circunvalación de la ciudá que yera nel Plan Xeneral vixente hasta agora, la raya de la que nun podía pasar la edificación urbana, y preve un aumentu de la edificación nes parroquies rurales xunta grandes unidaes d'espropiación pa lliberar terrén pa la edificación, que xestionaría Sogepsa.

La marcha, que quier forzar un procesu de negociación col Ayuntamientu pa camudar el planeamientu, va salir a les 11 de L'Arbeyal, Granda, Roces y la Carbayera del Tragamón pa xuntase toles marches a les 12 na plaza l'Umedal, d'au va dir la manifestación pa contra la plaza l'Ayuntamientu.

La convocatoria de 'marcha verde' nun foi precisamente una decisión que se tomare por unanimidá, y tol procesu ta xenerando una fonda resquiebra ente les directives de delles asociaciones y los sos socios. Una asamblea en Lleorio pa decidir si se facía la marcha acabó con intervención policial cuando los vecinos vieron que dellos presidentes d'asociaciones camudaben el votu positivu a la marcha que-yos encomendaren dar los sos socios. Delles asociaciones, casu de la de Veriña, tuvieron abonda rocea por esti asuntu, y la de Fontaciera, pidió formalmente la dimisión de la presidenta, pero con too y con ello, a la fin namás dos de les 21 asociaciones de la zona rural van quedar oficialmente fuera de la manifestación de güei, pa la que los convocantes cuente con llevar más de 2.000 persones.