Les opciones y futuros baxen l´Ibex

Probetaya selmana nos mercaos bursátiles. Na Bolsa de Madrid, el vencimientu de futuros y opciones ficieron que la selmana pesllare en perdes. Los inversores vendieron a esgaya dempués de delles xornaes de beneficios, lo que fizo que la cayida fuere más dura. Amás, les perimportantes cayíes d´Inditex y Telefónica nun ayudaron a caltener los índices. Mentanto nos mercaos internacionales la estabilidá torna a los parqués gracies a dellos datos económicos.

Ente estes estadístiques, rescampla la medra de la producción industrial n´Italia, con un +1,5% y los precios de la producción industrial n´Alemaña, que xubieron, anque perbaxo de les previsiones. A la contra, el coste llaboral nos países comunitarios tuvo una xuba del 2,9%. Nel Vieyu Continente les bolses nun tuvieron un bon pieslle'l vienres. La crisis en dellos países europeos ta emburriando a vender los muebles de la güela como ta faciendo Holanda, onde'l Gobiernu entamó la vienda d´un 12% del capital de la empresa de telecomunicaciones KPN, que va mercar Citigroup.

Si los parqués de Llondres y París trancaron con perdes penriba´l 1%, Wall Street tampoco nun tuvo tampoco un bon pieslle'l vienres. Sicasí, el xueves foi´l meyor día nel mercáu neoyorquín con una xuba que punxo'l Dow Jones nos niveles más altos en más d´un añu. L´índiz Nasdaq peslló la selmana pasada nos 1.905,74 puntos mentanto que´l Dow Jones mangóse nos 9.645,59 puntos.

Resultáu negativu nel mercáu madrilanu polos malos resultaos d´Inditex y Telefónica xunta'l mal camín que lleven opciones y futuros. Permala selmana pal Grupu Telefónica, onde la matriz nun foi a caltener los 11 euros acción, con perdes selmanales penriba´l 2%. Les perdes abultaes atacaron con fuercia la compañía del gallegu Amancio Ortega, y Inditex cayó más del 12% polos malos resultaos de beneficios del primer semestre del añu. Nel terrén de les ganancies destaquen Sogecable, ensin dulda'l valor más rentable d´esti añu, xunta Urbas, Abengoa, Telepizza, Sol Meliá, Gamesa, ENAGAS y Banco Popular. A la contra tuvieron delles perdes Avanzit, EADS, BBVA, SCH, Repsol, Amper y el valor especulativu Jazztel. L´Ibex-35 peslló la la selmana nos 7.102,70 puntos, con una baxada nel conxuntu la selmana de 1,29% mentanto que l´índiz xeneral de la Bolsa de Madrid perdió un 1,31%. L´índiz Nuevu Mercáu nun tuvo tampoco una bona selmana, con una perda de 0,98%.

Otramiente, la cayida del preciu del petroleu dexa la cotización del oru prieto en 25,5 dólares barril. El petroleu ta entamando una tendencia baxista que puede terminar col preciu nos 22 dólares, cifra na que van influyir les próximes decisiones de la OPEP y la situación n'Iraq. Per otru llau, la baxada del dólar ta emburriando'l preciu del oru, otra vegada más refugu de los inversores y que cotiza a 382 dólares la onza. Nel mercáu de renta fixo los bonos tuvieron una probetaya xuba de rentabilidá nun intentu de meyorar un añu permalu pa les inversiones nesti mercáu. Otramiente, l´euru ta garrando fuercia mentanto'l dólar ta perdiendo posiciones respective a la moneda europea y la nipona. L´euru ya val 1,1399 dólares, y el yen 113,60 dólares, un valor máximu pa la moneda del Xapón en dos años y mediu que-yos pon los pelos como escarpies a los esportadores