Les máquines entren a los pedreros

Según anunció ayeri la Delegación del Gobiernu n'Asturies, güei entama nos pedreros asturianos la llimpieza del galipote del Prestige, un llabor que va facese con unes máquines especiales que yá se llevaron primero pa Galicia. Según la nota oficial, trátase de 60 máquines d'hidrollimpieza que vienen col aval de la Universidá de Galicia. La comisión oficial sobre'l Prestige contrató pal llabor a dos empreses que van trabayar en domingos y festivos y que repartieron la costa asturiana en dos zones, la oriental de Colunga a Ribedeva, y la occidental, dende Villaviciosa a Castropol.

Los trabayos van entamar pel oriente, contándose con entamar güei na playa de Vidiago en Llanes, mientres que l'otru retén de trabayu va entamar el llunes pelos pedreros de Merón y España en Vilaviciosa.


Xunta esti llabor de llimpieza, fomentu diz qu'otres dos empreses van analizar l'estáu del sable de les playes pa estudiar la posible contaminación por hidrocarburos, entamando estos llabores un primer retén en Ribedeva y otru segundu per El Puntal (Villaviciosa) y San Llorienzo y Estaño en Xixón, esta cabera afectada tamién pol galipote del accidente del Lydia de va quince díes.

Otramiente, la campaña entamada dende'l gobiernu vien a contradecir les voces de dellos espertos en bioloxía de la Universidá d'Uviéu, que criticaron l'usu de máquines na llimpieza de los pedreros
por ser dañino pa la piedra y pa la microfauna qu'añera ellí, Al paecer de los biólogos asturianos, ye meyor retirar a mano lo más que se pueda y dexar que la mar vaya llevando colos años lo que quede en cuenta de rascar la piedra. Al dicir de los biólogos, el tiempu pa que'l pedreru se recupere pue ser hasta la metada retirando'l galipote a mano que si se gasta una técnica abrasiva pa cola piedra que va impedir que la vida pueda posar nella en bien de tiempu. Los biólogos lleven tiempu diciendo qu'hai qu'estremar ente llimpiar el galipote, qu'implica un dañu a la superficie, y retiralo, que ye lo que ven que fai falta.