Les lletres asturianes van pa Logroño

Logroño celebra a lo llargo d'esti vienres y del sábadu'l IV Día de les Lletres Asturianes que se fai fuera d'Asturies, una iniciativa conxunta del Conseyu de Comunidaes Asturianes en collaboración cola Academia de la Llingua que cada añu lleva a un centru asturianu distintu actividaes en rellación col idioma del país

Esta celebración, que yá se ficiere en Montevideo, Las Palmas y París, va facese esti añu en Logroño, emplegando como escenariu de les actividaes el monesteriu de Yuso. El llugar de nacimientu de la llingua castellana va acoyer les actividaes del programa d'actos qu'inclúin un recital de la cantante de pop asturiana Esther Fonseca, un homenaxe al poeta Roberto Iglesias y una serie de conferencies nes que van participar l'académicu de la llingua Pablo Xuan Manzano, que va presentar el día de les lletres, Manuel de la Cera, que va presentar a la figura d'Andrés Solar y, pa lo último, l'autor de Paniceiros Xuan Bello .

Per otra parte, el programa complétase colos pases de curtios n'asturianu Lluvina, de Juan Luis Ruiz y '7337 el curtiu de Sergio Sánchez que protagoniza Marta Belaustegui. Un conciertu del Orfeón de Mieres y una espicha nel Centru Asturianu van pesllar los actos culturales.

D'otra manera, el día de les lletres asturianes en Logroño tamién se contaba con aprovechalu pa que'l Centru Asturianu-y entregare al Presidente asturianu Vicente Alvarez Areces el distingu de "Sociu collaciu". Llamentablemente,l'axenda del presidente va obligar a dexar la entrega pa meyor ocasión