Les contradiciones de Fomentu

Un añu dempués de la catástrofe del Prestige, un nuevu datu vien a esfarraplar la versión oficial del Ministeriu de Fomentu na xestión del accidente del petroleru. Hasta agora, la tesis oficial del Gobiernu yera que la decisión d'alloñar el Prestige de la costa tomárase'l día dempués del accidente, ello ye, el 14 de payares, y siempres dempués d'entruga-yos a dellos espertos nel tema y técnicos de Marina Mercante. El casu ye que restolando nel web del Ministeriu de Fomentu entovía pue atopase esti comunicáu de prensa (en formatu .pdf) nel que, con fecha del 13, diz que se decidiere separtar el barcu de la costa "pa minimizar el posible dañu". Esti comunicáu esfarrapla tolos testimonios oficiales, dellos pronunciaos énte xueces, casu de la declaración del Capitán Marítimu de A Coruña, y tamién contradiz los demás comunicaos qu'asoleyó Fomentu.


Otramiente, el Presidente d'Asturies Vicente Álvarez Areces y el Conseyeru de Xusticia F. J. Valledor presenten güei en Bruseles el "llibru blancu del Prestige". Na obra, fecha pola "Fundación Alternativas" por encargu del Gobiernu asturianu, cuenta cola particcipación de dellos espertos y profesores d'universidá y fai un analís de la seguridá marítima y del accidente del Prestige

, proponiendo delles midides pa qu'estos socesos nun se repitan. De la que se presentó n'Asturies el "llibru blancu" foi oxetu de la crítica del PP, qu'echó pel llibru afirmando que la fundación encargada de redactar el llibru yera una entidá arreyada al PSOE, colo que la seriedá de la obra quedaba en dulda.

Pa tener más información sobre'l desastre del Prestige nun dexamos d'encamentar la visita al portal gallegu Vieiros, onde hai tamién un reportaxe sobre la manifestación qu'esti domingu axuntó a cerca de 100.000 persones en Santiago de Compostela