Les claves de la propuesta de Foro Asturias

Adrián Pumares confirmó’l martes na Xunta Xeneral l’apoyu de Foro a la reforma estatutaria y a la oficialidá con delles condiciones. Na cuestión llingüística, amás de la voluntariedá, esixe una mayoría de trés quintos p’aprobar la llei d’usu posterior cola fin de blindala pal futuru.

Entamar “una reforma integral de la nuesa autonomía, incluyendo’l so Estatutu” ye la propuesta de Foro p’apoyar la reforma estatutaria impulsada pol Gobiernu d’Adrián Barbón. Una Llei d’Impulsu Demográficu, ayudes direutes a la natalidá de 150 euros mensuales por fíu nes primeres etapes de la vida y la bonificación del impuestu de socesiones hasta la cantidá d'un millón d’euros son les principales esixencies puestes por Pumares pa garantizar el so votu, el númberu 27 clave p’algamar los trés quintos de la cámara necesarios pa modificar la norma autonómica.

Una cifra que Foro tamién quier imponer pa l’aprobación de la llei d’usu que desendolque la oficialidá, cuestión que la Federación Socialista Asturiana (FSA-PSOE) quier dexar pa la próxima llexislatura, cola previsión interna de que les fuercies favoratibles anguaño a la oficialidá tengan tamién una mayoría reforciada nel 2023. Con esta midida la formación de Pumares quier blindala de cara a un futuru nel que la derecha contraria a la oficialidá pueda sumar los votos necesarios pa modificala o torgala, y aseguraría tamién ser un axente decisivu nes negociaciones de cumplir les sos espeutatives de crecimientu.

La voluntariedá y non imposición del idioma, "incluyendo, claro, la vehicularidá de la llingua”, ye la otra condición marcada pa sofitar la oficialidá, señaló Pumares na so intervención na segunda sesión del alderique d’orientación política xeneral correspondiente al añu llexislativu 2021-2022.

L’impuestu de socesiones

Barbón, qu’amosó ayeri la so disposición a negociar apuntando que “yo nun puedo decidir por min, tien que ser una decisión de la Comisión Executiva Autonómica del partíu, que tien que s’axuntar y valorar los requisitos”, llamó tamién a Izquierda Xunida (IX) y Podemos a reflexonar énte la situación nueva que s’abría nel alderique. La bonificación del impuestu de socesiones hasta’l millón d’euros propuestu por Foro ye la midida que más oposición pueda tener ente les dos organizaciones a la izquierda del PSOE, sobre manera na formación morada, pero habría llugar a la negociación peles cuatro partes pa rebaxar la llende marcada de primeres por Pumares.

La intención del presidente y recién reelixíu secretariu xeneral de la FSA ye acudir al 33 Congresu socialista, a celebrar del 17 al 19 d'avientu n'Uviéu, con acuerdu presupuestariu y la reforma del Estatutu pautada. Los tiempos pa la modificación de la norma autonómica va marcalos el PSOE y, según el calendariu propuestu por IX y Podemos, d’empezar la tramitación esi mes habría tiempu de votar el testu nuevu pa San Xuan, al final d’esti mesmu periodu de sesiones.

Llueu quedaría’l trámite de les Cortes, con mayoría suficiente nesta llexislatura pa la so aprobación.