Les bolses afuéguense n'agostu

La xuba del paru nos Estaos Xuníos y l'entamu d´un mes típicamente de descansu tiraron p'abaxo peles bolses internacionales. Amás, les duldes alrodiu les perspectives económiques tornen a unos mercaos planos dende´l puntu de vista técnicu. La selmana pasada foi de más a menos con un bon entamu de datos económicos, pero col avance de la selmana acentuóse la tendencia baxista. L´Ibex-35 trancó en perdes.



La estadística de la selmana foi ensin dulda'l mal datu de desemplegu d´Estaos Xuníos. La primer economía mundial destruyó más puestos de trabayu por sestu mes seguíu. Esta vegada foron 44.000 los puestos de trabayu destruyíos, y, anque la tasa de desemplegu del país ta nel 6,2% (meyor de lo que se contaba) l´anuncia de la perimportante perda de puestos de trabayu ablucó a la comunidá inversora. Les pantasmes de la crisis tornaben asina a los parqués bursátiles de tol mundiu animaes por otres estadístiques d´Estaos Xuníos que nun-yos prestaron gotaa los inversores, casu del datu del ISM manufactureru o el probetayu gastu de construcción. Namás el datu de confianza de la Universidá de Michigan, con 90,9 puntos, meyoró les perspectives de los analistes. Asina, Wall Street tuvo un pieslle negativu, mientres l´índiz tecnolóxicu Nasdaq baxó'l vienres un 1,12% p´asistiase nos 1.715 puntos. L´índiz Dow Jones tamién tuvo una cayida del 0,86% y quedó nos 9.154 puntos.

N´Alemaña'l datu de ventes minoristes foi del 1,9%, mui positivu en comparanza con otros meses, pero ello nun foi a torgar les abultaes perdes nel Vieyu Continente al pieslle de la selmana, rescamplando la baxada del 2% del índiz Dax alemán, fundíu pol mal resultáu empresarial de Deutsche Bank. El restu de les places europees trancaron la selmana en perdes dempués de dellos díis de febles resultaos empresariales. Na Bolsa de Madrid, l´Ibex pieslló nos 6.995,40 puntos con una baxada'l vienres pasáu del 0,94%. El volume de negociu del vienres algamó los 1.204 millones d´euros, mui baxu, anque´l normal en tiempu de branu. A lo llargo de la selmana'l selectivu Ibex tocó los 7.081 puntos, anque nun pudo caltenelos. De toles formes ye una bona noticia porque ye fácil que se supere la muria de los 7.000 si les anuncies acompañen. Ente los valores con xubes destaca'l 4% de Zeltia, que dio dellos brincos pol so propiu calter especulativu. La noticia de la selmana foi'l canxe de la fusión ente Metrovacesa y Bami, onde otra vegada más los inversores minoritarios siguen perdiendo. El casu ye que'l valor de l´acción de Metrovacesa baxó a esgaya nestos últimos díes mentantu que xubió'l de Bami. Al final, col canxe marcáu na OPA, quien tuviere más de 88 acciones de Metrovacesa diba perder perres. Claro, ello pa los pequeños inversores, porque los grandes ya ficieren l'agostu a otru preciu y col placet de la cuestionada CNMV. Nel tarrén de les perdes destacaron SCH y BBVA. El Grupu Telefónica trancó la selmana con perdes de la matriz, de TPI y de Telefónica Móviles. Iberia, Iberdrola y Unión FENOSA foron otros valores que pesllaron en negativo. L´anuncia del Gobiernu del Estáu de baxar la previsión de crecimientu económicu del 3% al 2,3% diz muncho de la desaceleración económica d´anguaño.

Ente les materies, xuba del preciu del barril Brent hasta los 29,1 dólares lo que ye un 2,5% más. Tres delles selmanes d´estabilidá pal preciu del petróleu, parez qu'agora quier tomar una tendencia alcista. La cosa ye que mentantu'l petróleu iraquino nun salga´l mercaú los precios van xubir en cada vegada más. A la contra, l´oru baxó hasta los 353 dólares onza lo que supón una cayida de mediu puntu porcentual. El mercáu de renta fixo meyoró pola baxada de les bolses. El bonu español tien anguaño una rentabilidá del 4,23%. L´euru continúa en caída llibre hasta tocar el vienres el mínimu en munchu tiempu: 1,1135 dólares. Finalmente la moneda europea trancó nos 1,1260 dólares énte l'empeoramientu de la economía norteamericana.