Les autonomíes van poder solicitar l’estáu d’alarma nos sos territorios

|
Pedro Sánchez estáu alarma autonomíes

El presidente del Gobiernu estatal, Pedro Sánchez, fixo una intervención institucional esti martes tres el primer Conseyu de Ministros depués de les vacaciones. Ufre a les autonomíes la posibilidá de solicitar l’estáu d’alarma nos sos territorios énte les esmolecientes cifres de contaxos de coronavirus SARS-CoV-2 y cede 2.000 militares formaos en rastrexamientu de casos positivos.

“Toles comunidaes autónomes tienen a la so disposición la ferramienta llegal del estáu d’alarma y la posibilidá de solicitar la so declaración en tou o en parte del so territoriu”, aseguró’l socialista. Darréu esplicó que’l presidente de l’autonomía, mandu únicu, comparecería xunto col Gobiernu nel Congresu “pal necesario control parllamentariu, pa dar cuenta de la declaración y, si fora necesario, pa socilitar les prórrogues” d’una posibilidá llegal mui defendida por Adrián Barbón que permite llendar la movilidá.

Sánchez reconoció que ye “esmoleciente” la evolución de la pandemia de COVID-19 y pa tratar de controlar los biltos ufrió tamién a les autonomíes “efeutivos de la Fuercies Armaes pa facer llabores de rastrexu”. En total son 2.000 los militares preparaos que van tar a disposición “sobre manera de les comunidaes que tengan mayor dificultá”, cola intención de siguir formando más efeutivos nes selmanes próximes.

Contador Estadistiques