L'efectu del ataque a Iraq nes esportaciones asturianes

L'ataque de los Estaos Xuníos a Iraq va afectar a les esportaciones asturianes yá qu'Asturies foi l'autonomía española que más esportó al país árabe nos dos años últimos . Les ventes asturianes superaron los 19,4 millones d´euros dende´l 2002 nun períodu onde les esportaciones españoles a Iraq menguaron un 30% respective al 2001. Les ventes de les empreses asturianes colocáronles mui per delante de Madrid, con 13,2 millones, Cataluña con 12,2 y Euskadi con 2,2 millones d´euros. De fechu el 5% de les esportaciones astures van pa la parte d´Oriente Mediu onde delles empreses d´Asturies atoparon unos atractivos mercaos pa espardese. Aparte de que la entrada a Iraq queda trancada pola guerra, tamien peligren les ventes en países como Turquía, Exiptu o l'Irán.



Esbillando per empreses y sectores asturianos que trabayen n'Irak, la empresa llechera Ilas ye una de la que más se beneficiaron del programa d´ayuda a la infancia de la ONU n'Iraq, mientres que Duro Felguera tamién tien clientes na zona gracies a la compra de material por parte de grupos petrolíferos de Xordania, Exiptu y Iraq. Aceralia, pela parte que-y toca, tien bones ventes de productos siderúrxicos nel Irán onde tamién opera Asturiana de Zinc (AZSA). Xunta estes, empreses como Talleres Zitrón, TSK, Aleastur, Tekox, KLK o Esmena tienen presencia comercial na zona, y otres empreses, anque nun tienen delegaciones nin representes na zona sí que tienen negocios, casos d'Asturfarma, Samoa, Xeneral de Xuguetes, Indusla, Temper y Urmobile. Según l´asociación Exportastur les ventes asturianes en Iraq algamaron más de 53 millones d´euros nos últimos dos años, siendo los productos asturianos más demandaos n'Oriente Mediu los químicos, l'aluminiu, los bienes d´equipu, productos siderúrxicos, aceru, cinc, pieles y cerámica.



Asturies ye la segunda rexón del Estáu con menos empreses qu´esporten. De fechu, les multinacionales asistiaes n´Asturies como Dupont, Suzuki, Thyssen o Bayer son les que faen les más de les esportaciones. Anque son mui poques les pymes asturianes que venden fuera -sobre unes 200 empreses- el conflictu bélicu nun favorez el que sigan espardiéndose nuna zona como Oriente Mediu que-yos ufiertaba delles oportunidaes comerciales.