L'ecoloxismu pon verdes a los peores del añu

Col fin d'añu, la Coordinadora Ecoloxista d'Asturies convoca por 11 añu, el premiu "Buyada Purpurina", que reconoz el llabor de la persona, empresa o entidá que más ficiere contra'l mediu ambiente n'Asturies. La mesma organización reconoz qu'esti añu hebo candidatos a esgaya, y que va ser difícil escoyer al ganador, que namás pue ser ún. Lo cierto ye que la llista de nominaos, con once candidatures, ye un repás a dellos de los aspectos más importante del añu mediuambiental n'Asturies.

Entamando pel acabu, pola obra del refuxu del Meicín en Penubina, un de los proyectos que más tan dando que falar estes selmanes, son candidatos el Director de Deportes Daniel Gutiérrez Granda y tamién el presidente de la Federación de Montaña d'Asturies, Juan Rionda. El primeru tamién fai méritos al premiu pol proyectu de la estación d'esquí de "Fuentes de Invierno"

Ente los pesos pesaos de la política asturiana namás entra a les candidatures el secretariu del Soma-UXT José Ángel Fernández Villa, por arrenegar del protocolu de Kioto y por afalar la construcción de más centrales. Por supuesto que tamién puntúa Hidrocantábrico, qu'axunta otros méritos, que son la falta d'inversiones pa depurar los gases de les sos térmiques y pola falta d'ética ambiental que supón el facer campañes d'imaxe "verde" y depués nun llevar a la realidá esos principios, poniendo por casu pa espeyar esta falta d'ética el de Somiedu, onde la empresa sigue ensin pesllar la central hidroeléctrica.

La llista d'empreses candidates al premiu remátenla la DuPont, Hunosa, la papelera CEASA y les operadores de telefonía móvil. De la química americana los ecoloxistes dicen que quier vender por "verde" la fábrica de sulfatos y pesticides de Tamón llamándola fábrica de "Protección de Cultivos". De la compañía minera estatal, la Coordinadora llama l'atención sobre'l mal llabor que ta faciendo pa remocicar les esplotaciones n'abertal na cordal de Santumianu, con multtes del Ayuntamientu de Llangréu incluyíes p'afalar la candidatura. En cuantes a les teléfóniques, la so candidatura diz que toes elles engañen y compren a los vecinos ensin esplicá-yos el riesgu qu'impliquen les antenes de telefonía móvil. Pela so parte, la papelera de Navia ye candidata por afalar l'ocalitu en cuenta de les especies del país, lo que lleva a la perda de diversidá biolóxico, al dañu al suelu por erosiónn y a que'l fueu tamién dañe más.

Ente les instituciones públiques, hai candidatures pal Ministeriu de Mediu Ambiente, pola so política de facer paseos y aparcaderos pela costa y pola so xestión de los espacios naturales. La Confederación Hidrográfica, anque ye parte d'esti Ministeriu tien candidatura aparte poles obres proyectaes d'embalses y pola canalización de los ríos, que convierte en "canales de cementu"

El Director del Zoolóxicu de Cangues d'Onis tamién tien candidatura a títulu personal baxo l'acusación de "caciplar y andar venducando" con especies protexíes.