L'Axencia Europea de Medicamentos da’l preste a la vacuna de Pfizer pa neños de 5 a 11 años

|
Vacuna Comirnaty de Pfizer

L’Estáu podrá entamar a vacunar a les neñes y neños d’ente 5 y 11 años depués de que l’Axencia Europea de Medicamentos (EMA, poles sos sigles n’inglés) diera’l preste a la vacuna Comirnaty, desendolcada por Pfizer/BioNTech. N’avientu los campos de fútbol van siguir con aforos al 100 por cientu magar l’aumentu de casos de COVID-19, que yá raspien los 200 diarios n’Asturies.

Les recomendaciones de la EMA afiten que la dosis pa la reciella ha ser un terciu de la que reciben los mayores de 12 años, col mesmu periodu de trés selmanes de diferencia ente puestes na musculatura de la parte superior del brazu. La eficacia de la vacuna calculóse en cuasi 2.000 rapacinos, de los que la 1.305 recibieron realmente y 663 un placebu, algamándose un 90,7 por cientu d’eficacia en prevención de síntomes de COVID-19.

Asina, el Comité de Medicines Humanes de la EMA concluyó que “los beneficios de Comirnaty en neños d’edá de 5 ta 11 pesen más que los riesgos, en particular naquellos con factores qu’aumenten el riesgu d’una COVID-19 grave”, con mesmos efectos secundarios moderaos que podríen apaecer en persones de más de 12 años, como ye’l casu de “cansanciu, dolor de cabeza, encarnizamientu del llugar del pinchazu, dolor muscular y respigos”. El siguiente pasu ye treslladar esti dictame a la Comisión Europea, que tien la decisión final pa vacunar esti sector d’edá, el que tien mayor incidencia anguaño en tol Estáu, n’Asturies de 109,87 casos cada 100.000 habitantes a 14 díes na actualización última de los datos oficiales –correspondiente al martes– cuando’l total del país ta en 89,61.

2 hospitalizaos menos

La Conseyería de Salú comunicó la detección ayeri de 194 casos nuevos de COVID-19, 83 más que’l martes. Ye la cantidá rexistrada más alta dende’l 6 d’agostu, cuando se confirmaron 297 positivos.

Hai 72 pacientes hospitalizaos, 2 menos que’l día anterior, dambos na UCI, quedando un total de 8 ingresaos en cuidaos intensivos y 64 en planta. Nun se produxeron muertes cola enfermedá causada pol coronavirus SARS-CoV-2 per segunda xornada siguida.

Magar la medría de la incidencia’l Conseyu Interterritorial del Sistema Nacional de Salud decidió ayeri caltener p’avientu les mesmes condiciones qu’esti mes pa l’asistencia a espectáculos deportivos profesionales. L’aforu va siguir al 100 por cien n’espacios abiertos y al 80 por cientu en pabellones.

Contador Estadistiques