L’autoría, en dulda

Oficialmente, nun se sabe quien fizo los atentaos d'ayeri en Madrid. El Presidente del Gobiernu diz que "nun se descarta nenguna autoría" pero sigue apuntando pa contra ETA como primer sospechosa, anque na so comparecencia d'esta mañana nun se refirió esplícitamente a la banda terrorista vasca. Aznar dio anuncia de que, anque nel atentáu morrió xente de 11 nacionalidaes distintes, el Gobiernu va concede-yos la nacionalidá española a a tolos familiares que lo soliciten.

Mientres el gobiernu recula sobre l'atribución directa a ETA, anque Rajoy, Acebes y el mesmu Aznar reconocen que dulden muncho de l'atribución a Al-Qaida, la oposición parllamentaria echó esta mañana por primer vegada pel gobiernu, con crítiques que vinieron primero de Zapatero, quien dixo que creía que'l Gobiernu taba esmuciendo información, anque dempués aseló la crítica. Más duru foi'l catalán Carod-Rovira. El dirixente d'ERC atacó diciendo qu'Aznar ta mintiendo y que si sabe la verdá tien que dicila agora y non esperar al 15 de marzu, porque entós sedría un fraude electoral. El Lehendakari vascu Ibarretxe tamién pidió que s'esclarie cuanto primero quien foron los criminales en cuantes qu'hai "duldes razonables"