L'autocar mueve más de 2.000 persones al mes pela nueche

El "nuechibus" del Consorciu de Tresportes d'Asturies, serviciu d'autocares qu'atiende a les grandes ciudaes asturianes les nueches fines de selmana del veranu, rexistra una mayor aceptación esti añu que nel 2.002, en qu'echó a andar oficialmente. Con una xuba total del 15% d'usuarios, el Nuechibus movió un total de 586 persones nes dos selmanes que lleva funcionando, pero con too y con ello, la xuba de viaxeros nel trayectu Uviéu-Xixón contrasta cola baxada nos servicios con Avilés, que quedaron a un nivel d'usu mínimu, ello cuando'l nuechibus tien precios suvencionaos, costando'l billete d'ida 1,50 euros y el d'ida y vuelta 2,50. Esti fin de selmana, cola Selmana Grande en Xixón y les fiestes de Begoña, van reforzase los autocares con destín a la villa de Xovellanos, y va haber serviciu de nuechibus del xueves14 al domingu 17 dambos incluyíos.

Otramiente, el Consorciu de Tresportes d'Asturies dio los primeros datos d'ocupación de la llinia d'autocar ente Mieres y Xixón pela Autovía Minera. Dende que s'estrenó'l serviciu per carretera ente les cuenques y Xixón el 22 de mayu hasta'l 31 de xunetu, esta llinia movió un total de 4.440 persones, que se reparten en 2.099 en sentíu Xixón-Mieres y 2.341 en sentíu Mieres-Xixón, mientres que la llinia Llaviana-Llangréu-Xixón tuvo un movimientu de 4.117 pasaxeros.

Otra de les llinies nueves d'autocar entamaes pol Consorciu ye la que da serviciu ente la capital d'Asturies y los polígonos industriales de la parte de Llanera. Namás nel mes de xunetu, esta llinia, que tien de contribuyir a desconxestionar el tráficu nun de los noyos de carreteres más estragaos d'Asturies, rexistró un movimientu de 2.906 pasaxeros