L'aumentu de la presión hospitalaria lleva a habilitar cames en Les Arriondes y Llangréu

|
Hospital del Oriente Francisco Grande Covián

Esti llunes rexistráronse 470 casos nuevos de COVID-19, xornada na que nun hebo muertes.

L'incrementu de la presión asistencial lleva al Serviciu de Salú del Principáu d'Asturies a habilitar l'Hospital del Oriente Francisco Grande Covián, en Les Arriondes, p'acoyer a pacientes cola enfermedá causada pol coronavirus SARS-CoV-2 o con sospecha de tenela, sumándose asina a les yá disponibles nel HUCA, Cabueñes y Avilés. A partir de mañana va facese lo propio nel Hospital Valle d'El Nalón, en Llangréu.

Hai 99 pacientes hospitalizaos en planta, a los qu'hai que sumar otros 20 que tán na UCI. Son 1 menos entrambos casos en comparanza col domingu.

La Conseyería de Salú informó de 470 contaxos ayeri –l'actualización de los datos oficiales aumentó la cantidá total hasta 499–. Son 111 más que la xornada anterior, cuando comunicó 359, anque con una tasa de positividá menor: 13,78 por cientu, por un 14,18.

A 7 díes, esti porcentaxe yera enantes de l'actualización del 13,9 por cientu –ayeri xubió al 13,99 por cientu–. La Organización Mundial de la Salú (OMS) marca'l 5 por cientu como referencia a partir de la que s'empieza a perder el control de la pandemia.

Na xornada nun hebo que llamentar muertes, polo que'l total de finaos nel andanciu sigue en 1.987 –la revisión de datos rebaxa esta cantidá a 1.986–.

Repesca de mayores de 40

El SESPA facilita un sistema d'autocita pa la población nacida ente'l 1972 y el 1981 que nun recibieren la vacuna contra la COVID-19 por refugala o nun recibir contautu telefónicu, al igual qu'hasta agora ufríen a los mayores de 50 años. Los interesaos podrán escoyer fecha y hora pa la cita nesti enllaz, teniendo que seleicionar la opción 'Llamamiento extraordinario de vacunación'.

Na semeya, Hospital del Oriente Francisco Grande Covián.

 

Contador Estadistiques