L’Atenéu de Villaviciosa abre’l plazu pa un taller d’asturianu

|
Cartel Taller d'Asturianu nel Atenéu Obreru de Villaviciosa

Un nuevu Taller d’Asturianu va impartise nes instalaciones del Atenéu Obreru de Villaviciosa los miércoles de 18:00 a 20:00 hores, dende'l próximu 30 de marzu hasta'l 29 de xunu. El taller ta empobináu a toa persona interesada n’ampliar los sos conocimientos sobre llingua asturiana ensin importar el so nivel. Va atender tanto pa la estaya oral como pa la escrita, onde entrará'l repasu de les principales normes ortográfiques, tratando de aumentar la competencia individual al traviés del coaprendizaxe.

Les clases tan entamaes pol Serviciu de Normalización Llingüística de la Comarca de la Sidra, en collaboración col Atenéu Obreru y el Conceyu de Villaviciosa. Toles persones interesaes puen informase y apuntase al taller hasta’l mesmu 30 de marzu, usando los correos electrónicos normastur@lacomarcadelasidra.com o secretaria@ateneovillaviciosa.es. Tamién pue facese al traviés del teléfonu 600 30 53 08 o nel Facebook del Serviciu de Normalización Llingüística de Mancosi.

L’Ateneu Obreru de Villaviciosa tien un aula d’asturianu col nome "Carlos García de la Concha", n'homenaxe a esti médicu maliayu qu'escribió en llingua asturiana, y que foi ún de los fundadores y presidente del Atenéu. Nesti espaciu abiertu ye onde se desndolquen les actividaes venceyaes a la cultura y llingua asturiana. Amás, nel mesmu edificiu hai talleres d'otros idiomes, teatru, baille, música, meditación, yoga, artes marciales y talla de madera, por dicir dalgunos.

Contador Estadistiques