L’asturianu va poder usase nel Congresu, pero con autotraducción nel mesmu tiempu d’intervención

La Mesa del Congresu decidió esti miércoles que toles llingües oficiales van poder emplegase con normalidá dende’l Plenu de la selmana próxima, cuando va aldericase y votar la reforma del Regalmentu que lo permita. Les diputaes y diputaos qu’usen l’asturianu y l’aragonés, reconocíes xurídicamente n’estatutos autonómicos, van perder tiempu d'intervención al tener qu'autotraducise al castellanu.

La mayoría progresista superó na votación la oposición popular y diose’l preste dende yá al usu de les llingües oficiales nel Congresu magar les recomendaciones del informe xurídicu de los lletraos de la Cámara Baxa por, argumenten, la dificultá de garantizar de manera inmediata o nun plazu curtiu’l plenu entendimientu en tola actividá parllamentaria. Asina, dende’l martes va poder sentise gallegu, eusquera, catalán y aranés nes intervenciones, que van tener traducción simultánea al traviés de cascos nun sistema asemeyáu al del Senáu.

Nun va asoceder lo mesmo col asturianu y al aragonés. Al nun ser oficiales nun se van contratar traductores, anque va dase la posibilidá a les diputaes y diputaos qu’usen estos idiomes el so emplegu nel Congresu cola condición de que van tener qu’autotraducise al castellanu depués.

Esta repetición habrá de facese dientro del propiu tiempu d’intervención, lo que va limitar l’aición parllamentaria de los que quieran exercer esti derechu.

Na semeya, el Congresu na sesión constitutiva de la XV Llexislatura, celebráu'l 17 d'agostu.