L'asturianu tuvo na Universidá Carolina de Praga

Durante la selmana del 14 al 18 d'abril, tuvo llugar na Universidá
Carolina de Praga, República Checa, organizáu pol Llectoráu de Catalán
dependiente del Principáu d'Andorra, el primer cursu d'introducción a la
Llingüística Iberorrománica, que se prevé que tendrá continuación nel
futuru.

Tal cursu foi impartíu pol profesor de la Universidá Complutense
de Madrid, Xavier Frías Conde, onde presentó la Llingüística
Iberorrománica dientro del conxuntu de la Romanística, caracterizó les sos
llingües y depués presentó cada una d'elles individualmente. Daquella, el
mirandés, l'aranés, l'asturianu, el gallegu, el catalán y l'aragonés foron
presentaos, primero en conxuntu y depués individualmente, a un grupu bien
numerosu d'estudiantes y profesores de filoloxía checos.

Al respective del
asturianu, el profesor Frías Conde esplicó brevemente los sos orixes, les
sos característiques sociollingüístiques más destacaes y depués adentróse
na descrición gramatical de la llingua, básicamente l'asturianu estándar,
dedicando bien de tiempu al neutru de materia, que-yos llamó l'atención a los
estudiosos checos. El día dedicáu a la llingua asturiana tevo acompañáu
d'una escoyeta de testos qu'espeyaron nidiamente los trazos más propios
del asturianu, tratando de demostrar en tou casu que l'asturianu ye una
llingua perfectamente diferente del castellanu. Tiense previsto nesta universidá checa,
igualmente, otros cursos más específicos (sintaxis iberorrománica),
qu'impartirá tamién esti profesor d'orixe asturianu, y un alcuentru
d'escritores iberorrománicos onde participará, ensin dulda, dalgún escritor
asturianu.