L'asturianismu nes xenerales

A pocos díes qu'entame la campaña electoral pal 14 de marzu, ufiertamos una gráfica que fai una radiografía de la participación de les opciones asturianistes nes elecciones xenerales. L'asturianismu nunca nun tuvo opciones polítiques que tuvieren una vida llarga, sacantes los casos del PAS y Andecha Astur, pero la gráfica d'estes elecciones, que nunca nun tuvieron el ganchu pal electoráu que les autonómiques demuestra con muncha dureza lo efímero de munchos partíos.

La Unidá Regionalista d'Antonio Masip desfízose ensin sacar l'altu resultáu col que contaba, y tres de la curtia vida del CNA, que presentó nel 79 a Dubardu Puente, l'asturianismu tuvo güérfanu de partíos que se presentaren a les xenerales hasta la convocatoria de1.989, en qu'apaecieron n'escena la UNA y el PAS, que sacaron resultaos asemeyaos. Nel 93, desfecha la UNA tres la crisis al desfacese'l pautu col PAS pa les autonómiques del 91, el PAS apaez per primer vegada penriba de los 10.000 votos, mientres qu'Andecha Astur, ñacía en parte d'exmiembros de la UNA, algama un discretu resultáu de 771 votos. Nel 96, con Andecha ensin poder presentase al echa-y p'atrás la Xunta Electoral les candidatures por dir n'asturianu, el PAS, que d'aquella tenía a Xuan Xosé Sánchez Vicente de diputáu na Xunta Xeneral, tocó un techu máximu de 12.213 votos del que cayó hasta los 5.876 votos del 2.000, añu en que l'apaición de la URAS,escisión del PP que contaba con un ala importante de militancia asturianista alteró'l panorama.

Nel 2000 Andecha Astur pudo presentase al almitir el Supremu les candidatures n'asturianu y sacó un discretu resultáu de 2.036 votos. Esi añu apaeció tamién el Bloque de la Izquierda Asturiana, nel que taben presentes Izquierda Nacionaliega d'Asturies y Izquierda Asturiana, obteniendo 1.085 votos. Nin la URAS, por decisión propia, nin el BIA, por disolución del mesmu, van presentase nesti 2.004.