L'AsturHockey algama l'ascensu a la OK Lliga

Los cuatro equipos asturianos perdieron los sos partíos nes eliminatories d'ascensu a Segunda División B de fútbol.

Asturies va contar tamién con un equipu na máxima categoría del ḥoquei patinos masculín gracies al ascensu del AsturHockey Club Patín de Grau, que se suma asina al Hostelcur Xixón, equipu femenín qu'esta temporada se proclamó campeón de la OK Lliga y subcampeón d'Europa y de la Copa. Los moscones derrotaron al CP Patín Raspeig, colista de la Primera División y yá descendíu, por 0-5, resultáu que-yos permite ser segundos con 47 puntos, dos perbaxo del CH Palafrugell y ún perriba del Arenys de Munt, conxuntos que dan el saltu de categoría. Queda fuera, colos mesmos puntos que'l terceru'l Sant Cugat, que nun pudo pasar del empate na so visita al Shum Frit Ravich (5-5).

L'AsturHockey algama esti ésitu dos años depués de la so fundación tres sumar dos ascensos consecutivos con una plantiya formada principalmente por xugadores asturianos. D'esta forma, Grau vuelve a tener un equipu na máxima categoría del ḥoquei patinos estatal 17 años depués del descensu del Club Patín Areces, anguaño en Primera B. L'últimu equipu asturianu en competir na actual OK Lliga foi'l l'Esfer Oviedo na temporada 2007-2008.

Pasu atrás del Sporting B

L'Olot consiguió un premiu escesivu na so visita a Mareo pa enfrentase al Sporting B na eliminatoria de campeones, la que da l'ascensu direutu al ganador. El conxuntu xixonés perdió por 0-1 con gol d'Uri Santos nel minutu 64 tres un error de Juan Rodríguez, que dexó'l balón francu al delanteru catalán.

Los de José Alberto López López firmaron una bona primer parte, pero ensin aciertu cola portería contraria. L'Olot, pela so parte, fixo'l so partíu, bien asitiáu atrás y esperando la so ocasión, que llegó na segunda metá nel momentu de más dominiu visitante.

Tres el tantu, el Sporting B intentó igualar el partíu, pero nun foi quien a superar a la seria defensa catalana. El domingu, a les 18 hores, los xixones han de dar la vuelta al marcador n'Olot si nun quieren tomar la vía llarga hacia al ascensu.

Resultaos negativos

El restu d'equipos asturianos nos play-offs tamién perdió los sos partíos. El que meyor resultáu algamó foi l'Avilés, que cayó per 2-1 col Cristo Atlético nun partío nel que s'adelantó con un gol de Palazuelos, tantu que pue ser importante pol valor doble de los goles fuera de casa.

L'UP Langreo, mentes, nun pudo col Almería B, que ganó en Ganzabal por 0-1 con tantu d'Igor Engonga nel minutu 27. Los llangreanos han d'arriesgar el domingu al meudía nel partíu de vuelta, que va disputase nel Estadio de los Juegos del Mediterráneo, onde xuega'l primer equipu del club almeriense.

Pela so parte, el CD Tuilla nun foi quien a superar al UD San Fernando, que ganó por 1-2. Adelantáronse los canarios nel minutu 10 con un gol d'Antonio, llegando a igualar los de Chuchi Collado nel 74 por mediación de Prendes.

Nun duraría muncho l'allegría pal Tiuya, yá que dos minutos depués Medina ponía'l definitivu 1-2. El conxuntu d'El Candín buscará la remontada en Gran Canaria'l domingu a les 11, hora llocal.

Eliminatoria igualada

L’Unión Financiera Baloncesto Oviedo consiguió derrotar ayeri en Pumarín al Quesos Cerrato Palencia por 74-68 nel segundu partíu de semifinales pol ascensu a l'ACB, polo qu'igualó la eliminatoria. Los de Carles Marco perdieran el vienres por 74-76 y van viaxar el vienres (21 hores) a la ciudá castellana cola intención de repetir les dos victories fuera qu'algamaron contra l'Ourense en cuartos de final.

Semeya obra de Luis Velasco (RFEP).