L'Astur da de pasu la refundación

Nun hubo sorpreses, y los socios del Astur CF dieron de pasu nuna menguada asamblea, a la que namás foron menos de 100 de los cerca de 500 socios que tien, la ufierta del Ayuntamientu d'Uviéu pa refundar el club y aspirar a convertise nel equipu más importante de la capital. Pa ello cuenten cona llegar esti añu a los 3.000 socios y a que l'Ayuntamientu-yos acute'l Tartiere pa xugar, cosa que la directiva, mui discreta, tampoco nun reclama en alto anque reconoz que-y prestaría contar col estadiu más modernu d'Asturies.

Por un total de 41 votos contra 15, l'Astur CFdecidió nuna asamblea trancada a la prensa, aceptar el convite del Ayuntamientu, qu'ofrez un protocolu de patrociniu qu'inclúi el cambéu de nome y de color de camiseta (d'encarnada a azul) como señes esternes más evidentes, anque tres del alcuerdu hai coses que se noten menos pero que calen más. Asina lo ven, polo menos, los socios más de vieyo del Astur, contrarios al alcuerdu de refundación y que se llamentaben de qu'ayeri pela tarde-yos robaren l'equipu, ún de los históricos del futbol modestu asturianu. El presidente del Astur, Mario Rodríguez, contaba con más d'ochenta votos delegaos, pero nun precisó d'ellos pa sacar alantre la votación.

L'alcuerdu ente Astur CF y Ayuntamientu tien como ferramienta d'actuación la creación d'una Fundación que los grupos d'oposición nel Ayuntamientu carbayón ven como una "máquina de lavar dineru negro" al dicir del Conceyal d'IX Sánchez Ramos, quien foi más allá al dicir que la "operación fútbol" ye'l primer pasu de la carrera pa llegar a la presidencia del Principáu, y comparó la "operación fútbol" de Gabino de Lorenzo colos trafullos de Jesús Gil. pela so parte, el Real Uviéu sigue en campaña p'atropar socios, y diz que bien podríen llegar a 4.000. En casu de perder el Tartiere, l'alcalde de Siero, el socialista Juan José Corrales, sociu de vieyo del Uviéu, tien-y ufiertaos tres campos al Real Uviéu.
Pues poner la to opinión sobre l'asuntu nel Conceyu Abiertu de Deportes