L’Asociación Grana presentóse en públicu recibiendo “muncha disposición” y interés ciudadanu

|
Asociación Grana presentación rueda de prensa

Sorprendíos y agradecíos. Asina se sienten los collacios de Yolanda González Huergo qu’impulsen l’Asociación Grana n’alcordanza de la militante asturianista y activista polos derechos humanos depués de presentar esti espaciu d’alderique y reflexón na Casa Conceyu de Xixón énte l’interés amosáu pola ciudadanía estos primeros díes.

“Tamos atopando muncha disposición, anque llevando’l nome de Yolanda per delantre ye fácil”, espresa Rubén Fernández Ardura, compañeru d’Huergo que va facer la función d’ayalgueru na asociación. Son munches les persones que comparten la perspeutiva social y l’espíritu constructivu de la xixonesa que yá contautaron, en persona o pela web habilitada p’asociase, y ayudar asina a desendolcar los oxetivos d’esti coleutivu.

Ésti ye “tresformar la señaldá que produz el recuerdu de Yolanda l’amiga, la compañera, l’activista…, n’enerxía creadora, na grana azul del futuru de la que fala’l cantar de Felpeyu que tanto-y gustaba a ella”, espresaron el sábadu na sala de prensa de la Casa Conceyu, onde ella trabayaba pa la ciudadanía dende la vocería de Podemos-EQUO. Un espaciu onde se xuntaron representantes de tolos grupos municipales –VOX confirmara la so asistencia, pero una cuestión de salú impidió finalmente la presencia de la persona que diba acudir–, una amuesa del ciñu que llevantaba ente los sos compañeros ediles, a los que-yos prestó la idea.

Grana resúmese nun “espaciu d’alcuentru pal debate y pal pensamientu y d’estímulu a iniciatives diverses, pero siempre col focu puestu n’Asturies y cola perspectiva de la defensa de los derechos llingüísticos, los derechos humanos, la xusticia social y la protección del mediu ambiente, que foron los ámbitos nos que trabayó Yolanda, y calteniendo tamién l’espíritu constructivu y de diálogu que guiaron siempre la so trayectoria personal y política”. Con esa idea de “xenerar pensamientu dende Asturies” va entamar, con calter biañal, unes xornaes y un premiu a la investigación n’asturianu que se va convocar l’añu qu’entra.

Les xornaes, en payares

Les primeres xornaes entamaes por Grana lleven el nome ‘(Sobre)vivir n’Asturies. Presente y futuru del territoriu y la so población’ y van tener llugar la tarde del vienres 4 de payares y la mañana del 5 nel xixonés Antiguu Institutu. Nelles van participar seis convidaos, de dientro y de fuera del país, espertos en delles disciplines, que van tratar “la forma y repartu de los recursos n’Asturies, la ordenación del territoriu y la evolución del repartu poblacional”.

Asina, “la intención ye valorar, nun espaciu de debate y reflexón, cómo los planes y los debates actuales sobre los desarrollos urbanísticos, la evolución demográfica, el despoblamientu de les ales y los planes de desenvolvimientu económicu van condicionar el futuru d’Asturies”.

Contador Estadistiques