L'amenaza asturiana

Dende va tiempu, conviven nel occidente d'Asturies dos
organizaciones qu'interpreten de distintu xeitu la realidá idiomática
d'aquellos conceyos que tan ente'l Navia y l'Eo. Simplificando les coses,
mientres Xeira, ensin negar la evidente filiación llingüística al tueru
gallegu-portugués piensa que ye mester potenciar la normalización dende
una perspectiva asturiana, con una normativa propia y ensin influyencia
gallega, a La Mesa Para a Defensa do Galego de Asturias abúlta-y que la
normalización llingúística tien que tar lligada al país vecín y nel so
discursu aprofiase na "galleguidá non alministrativa" de la zona.

Ello ye qu'esta selmana, la Mesa estrenó la so web, una
páxina na que puen consultase los sos principios y reflexones sobre la
zona,
que dacuando paecen sacaos de lliteratura de ciencia-ficción. Para A
Mesa,
l'Academia de la Llingua Asturiana, conchabada col Principáu, fexo un
esfuerciu históricu por bablizar (sic) la fastera, y, pa más aquello,
mandáronse al Navia-Eo mayestros y mayestres qu'amuesen un total
desconocimientu, cuando non tarrecen dafechu, la llingua gallega.

En resume, aparte de concluyir que 18 conceyos d'Asturies falen
gallego normativo, pa A Mesa, l'asturianu, una llingua con un risible sofitu
llegal y ensin nenguna presencia na zona, nin nel restu d'Asturies, supón
un peligru. Esta percepción tamién la espeya'l diariu electrónicu gallegu
Vieiros, escribiendo na so edición de güei que l'occidente ye "unha zona
onde a falta de estatus legal da nosa lingua (el gallegu) e o acoso tanto
do español coma do asturiano estáa a sumir na
marxinalidade". Taría bien recordar que la nunca cumplida Llei d'Usu,
reconoz la singularidá llingüística de la zona y afita que'l
gallego-asturianu ha tener los mesmos drechos que l'asturianu. El problema
ye qu'esos drechos, anguaño, nun tán reconocíos. El restu ye entrar nun
debate terminolóxicu que namás favorez les postures de los que, nos dos
paises, s'asitien en postures poco informaes, basaes n'intereses
partidistes y que busquen l'enfrentamientu. Por ciertu, el testu qu'apaez
na páxina ye del añu 1992.

Contador Estadistiques