L’ALLA escribe al INE pa solicitar que l’asturianu “seya oxetu espresu d’atención nos estudios” futuros

|
Llar social de l'ALLA

Les “llectures enquivocaes de la situación sociollingüística asturiana” provocaes por una encuesta del INE, que nun entrugó pol asturianu de manera específica nuna pregunta sobre ‘Conocimientu de llingües’, llevó a l’Academia de la Llingua Asturiana (ALLA) a remitir una carta a la so direutora. Solicita que l’asturianu “seya oxetu espresu d’atención nos estudios que, nel futuru, pueda desendolcar” l’organismu.

Foi’l vienres cuando la institución académica unvió dicha carta a Elena Manzanera. Nella esplícase los problemes interpretativos que tán derivando de la Encuesta de Carauterístiques Esenciales de la Población y Viviendes (ECEPOV), nel que se rexistraba que namái un 2,8 por cientu de los ciudadanos consideraben que falaben bien asturianu.

La razón d’esti baxu porcentaxe foi que nun s’entrugara n’Asturies pol asturianu, dalgo que nun asocedía n’otres comunidaes autónomes billingües. Asina, nos territorios nos que l’idioma propiu ye oficial, amás d’unviar el cuestionariu nes dos llingües, preguntaben pol grau de conocimientu de les dos, como pudo confirmar Asturies.com llueu de consultar al área encargada de la ECEPOV del Instituto Nacional de Estadística (INE), cola opción d’añadir llueu otros idiomes que supieren –espaciu onde dalgunes persones asitiaron al asturianu–.

Dada la situación, y sobre manera depués de les “llectures enquivocaes de la situación sociollingüística asturiana” por dicha encuesta, l’ALLA pide al INE que l’asturianu “seya oxetu espresu d’atención nos estudios que, nel futuru, pueda desendolcar esta institución de dependencia estatal”. Igualmente, na carta aprovechó pa tresllada-y a Manzanera dalgunes de les claves sobre los sectores sociocultural, políticu y educativu en rellación cola llingua asturiana.

Na semeya, llar social de l'ALLA.

Contador Estadistiques