L’ALLA entruga pol neoloxismu del añu

Una votación na rede pa escoyer el neoloxismu del añu 2023 ente cinco términos d’actualidá social. Ye la iniciativa novedosa de l’Academia de la Llingua Asturiana (ALLA) pa involucrar a la ciudadanía asturiana na escoyeta de pallabres qu’incorporar al Diccionariu.

Y ye que, según anuncia la institución, la que más votos reciba va entrar nesta gran obra, anque seguramente les cinco, pol so usu, van pasar a formar parte del léxicu de la llingua asturiana. Son cambéu climáticu, intelixencia artificial, xentrificación, llimpieza étnica y xeollocalización.

Les persones que quieran participan han calcar nesti enllaz, introducir el so corréu electrónicu y escoyer el neoloxismu que considere’l más afayadizu. El plazu pa votar fina’l vienres.