L’ALLA dedica un documental a Lourdes Álvarez pol so Premiu Nacional de Lliteratura Asturiana

|
Cartelu documental Lourdes Álvarez III Premiu Nacional de Lliteratura Asturiana ALLA recortáu

‘Lourdes Álvarez. Premiu Nacional de Lliteratura Asturiana 2023’ ye’l títulu de la pieza audiovisual que l’Academia de la Llingua Asturiana (ALLA) dedica a la poeta de La Güeria d’Urbiés, merecedora de la tercer edición del gallardón que reconoz una trayeutoria. El documental yá ta disponible pa la so visualización na canal de YouTube de la institución.

L’ALLA estrena asina esta vía “col envís d’homenaxala y esparder el so llabor”. Dirixíu pol académicu Inaciu Galán, na cinta otros escritores y espertos conocedores de la obra d'Álvarez percuerren frente a la cámara los caminos de la so poesía, analizando la so carrera, les carauterístiques de la so poética y otros elementos como’l so compromisu col asturianu.

El llistáu de participantes lidérenlu los otros dos ganadores del Premiu Nacional de Lliteratura hasta la fecha, Xuan Bello y Xuan Xosé Sánchez Vicente, y inclúi otros nomes destacaos de les nueses lletres como Marta Mori, Roberto González-Quevedo, Esther Prieto y l’espertu en lliteratura asturiana Xosé Ramón Iglesias Cueva. Na pieza recuéyense tamién semeyes de la vida personal y como escritora de l’autora.

Parte de la música del documental ye obra d’Anabel Santiago, artista cola que tien collaborao en delles ocasiones Álvarez, poniendo lletra a dalgunos cantares. La pieza, de 16 minutos de llargor, preestrenóse’l martes nel llar de l’ALLA cola presencia de la poeta, qu’amosó’l so agradecimientu pol detalle.

 

Contador Estadistiques