L'Academia presentó la Historia de la lliteratura Asturiana

Nun actu que se celebró ayeri nel Aula Magna de la Universidá d'Uviéu, l'Academia de la Llingua presentó la Historia de la Lliteratura Asturiana, obra enciclopédica que, d'agora en p'alantre, va servir d'encontu pa la investigación, divulgación y conocimientu de la lliteratura n'asturianu. Na presentación, el profesor Miguel Ramos Corrada, coordinador de la obra, solliñó qu'esta ye la más completa obra sobre'l tema y la primera que se fai dando-y un tratamientu dignu a la tradición lliteraria astur, ensin vela como un apendiz d'otres lliteratures o como daqué "menor. Esta obra vien tamién a pesllar el ciclu más importante de trabayos de l'Academia, definíu por la gramática, el diccionariu y qu'agora vien a rematar esta historia de la lliteratura.

Miguel Ramos Corrada, una de les másimes autoridaes en lliteratura asturiana, esplicó que'l llibru acabante de presentar ye'l resultáu de mas dos años de trabayu nos que, aparte de facer la cadarma de la obra y escribir los capítulos dedicaos al Barrocu, Romanticismu y Modernismu, tuvo de coordinar un equipu d'especialistes n'estayes concretes que collaboraron pa facer dellos separtaos.

La llista de collaboradores inclúi a Xosé Lluís García Arias pa la lliteratura medieval, Marta Mori pa la lliteratura del XVIII, Xosé Ramón Iglesias pa la segunda metada del XIX y Begoña Díaz González pa la lliteratura de posguerra, un periodu abegosu y difícil, como lu definió'l mesmu Ramos Corrada. Pela so parte, l'estudiu del surdimientu corrió al cargu d'Ánxel Álvarez Llano pa la prosa, Xosé Bolado pa la poesía y el teatru, Lluís Álvarez pal xéneru ensayísticu. La presidenta de l'Academia Ana Cano González y Antonio Fernández Insuela trabayaron sobre la lliteratura tradicional de tresmisión oral y Xosé Miguel Suárez encargose d'una parte dedicada a la lliteratura eonaviega.

La obra, guapamente encuadernada y con illustraciones de debuxos y grabaos depintores asturianos de los sieglos XIX y XX yá ta a la venta a un preciu de 30 euros y pue encargase n'Asturshop, la tienda asturiana na rede con servidor de pagu seguru.