L'Academia de la Llingua entama una nueva ufierta formativa p'adultos

Asociaciones culturales, vecinales y colectivos de toa triba van participar d'un nuevu programa formativu de l'Academia de la Llingua Asturiana qu'intenta cubrir güecos de demanda d'enseñanza del asturianu onde nun llega la ufierta formativa tradicional .

Según esplicó a Asturies.com Xosé Antón González Riaño, responsable de la idea de los cursos, la iniciativa pa ello vieno d'aplicar les conclusiones del estudiu sociollingüísticu de Llera Ramo, que diz nun de los sos puntos que xeneraciones enteres d'asturianos adultos que tuvieron l'asturianu como llingua materna tan perdiéndolu, afalando a un mayor esfuerzu na alfabetización d'adultos.Pa Riaño "esiste un sector de población de cierta edá que fala n'asturianu pero que nun se reconoz nel asturianu escritu, de lo que se trata con estos cursos, que representen una ufierta formativa nueva dafechu ye de que s'alquieran estratexes de llectura y escritura n'asturianu qu'ayuden a identificase col idioma pa qu'estes xeneraciones nun lu pierdan"

Trátase con esta iniciativa tamién d'enanchar el campu xeográficu d'actuación y llegar a pequeñes parroquies o a colectivos pequeños con una ufierta formativa básica d'alfabetización. Con ello l'ALLA quier complementar los tradicionales cursos d'asturianu que ponen munchos conceyos ensin competir con ellos con una formación qu'hasta ciertu puntu podría denominase
"baxo demanda" en cuantes que cada cursu va dase en collaboración coles asociaciones de vecinos o entidaes locales que los soliciten, una collaboración cola que se busca tamién una implicación por parte del "sociu local".


La parroquia de La Collá en Siero, y otres de conceyos de tola xeografía asturiana, como Llanes, Ribeseya, Llaviana o Casu van ser les primeres en participar d'esta iniciativa, que busca esparder xeográficamente l'enseñu del asturianu hasta requexos onde normalmente nun llega, y atender tamién a una formación específica pal Navia-Eo. Asina, ún d'estos cursos va ser el de Gallego-asturianu que l'Alla va poner en collaboración con Xeira nel Institutu de Tapia. Les clases van ser los llunes y los vienres y va dales una especialista en gallego-asturianu a lo llargo de trés meses de duración.