La XVI Folixa na Primavera arranca en Mieres esti vienres

Dende esti vienres y al domingu, Mieres va vivir tres díes de música folk y sidra nel marcu de la XVI Folixa na Primavera. Macadamia, Corquiéu, Blima y La Coḷḷa Propinde son los grupos que participen nesta edición de la Folixa.
 
A les 20 hores ta previsto’l principiu de les actividaes nel parque Xovellanos cola llectura del pregón, qu’esti añu va facer la cantante Tina Gutiérrez. De siguío, Mariluz Cristóbal Caunedo va recibir el XI Distintivu Fini Suárez a la investigación folclórica pola so contribución al desarrollu de la canción asturiana. El tiempu de la sidra va comenzar a les 20.30 hores, cola espicha de los toneles de la Folixa. Esti añu ta previsto’l repartu de baldre, previa compra del vasu del certame, de 10.000 llitros de la bébora tradicional del país.
 
Tamién a les 20.30 hores va entamar la música, coles actuaciones de la Banda Gaites Villa de Mieres y el Grupu de Baille Xorrecer. A les 23 hores llega’l turnu de les actuaciones musicales principales cola presencia de los llocales Macadamia y Corquiéu, estos últimos a partir de la 1 de la madrugada.
 
El sábadu, l’actividá de la Folixa va principiar a les 11.30 hores cola actuación del grupu folclóricu Ruxidera. Al meudía va servise de nuevu sidra de baldre y, a partir de les 13 horas, la Banda de Música Mieres del Camín va amenizar la xornada colos sos temes. Yá de tarde, a les 19.05 hores, y coles pipes abiertes, va entamar el concursu de tonada cola participación d’Álvaro Fernández Conde (Lamasón, Cantabria), Rosario González (Ḷḷaciana, Lleón) y José Manuel Collado (Asturies), xunto col gaiteru Iván Rionda.
 
Pa les 20.30 hores va ser el turnu de la Banda de Gaites Mieres del Camín y del Grupu Folclóricu L´Artusu, enantes de dar pasu a Blima, a les 23 hores, y a La Coḷḷa Propinde, a la 1 la madrugada. A les 2.45 hores, va interpretase la Danza d’Oñón.
 
El domingu, na última xornada festiva, va vendese, a les 9 la mañana, la ‘bolla’ de la Folixa na Plaza d´Abastos, el Requexu y el Parque Xovellanos. A les 11.30 hores nel mesmu parque, va actuar el Grupu Folklóricu Prau Llerón enantes de la cita última cola sidra de baldre. Pero ehí nun termina la fiesta, puesto que les persones interesaes pueden dir xintar el menú especial que preparen estos díes 13 establecimientos hosteleros de la ciudá. Ésti ta compuestu por sopa d’ablanes o menestra del tiempu, bacaláu o cabritu, y borrachinos o sorbete de sidra.
 
Amás, la xente a la que-y preste’l teatru, va poder disfrutar esta fin de selmana de les obras ‘Ahora que la aldea ya no existe’, de Producciones Nun Tris (vienres), y ‘César a gusto y el chorizo enmascarado’, del Llar de Ujo (sábadu), nel Auditoriu Teodoro Cuesta. Actividaes pa tolos gustos nun fin de selmana mui esperáu na cuenca’l Caudal y en toda Asturies.