La Xunta pola Defensa de la Llingua propón unes bases mínimes pa una política llingüística n'Asturies

La Xunta pola Defensa de la Llingua Asturiana (XDLA) celebró esta fin de
selmana en Siero unes xornaes de trabayu sobre normalización llingüística.
Nelles tratóse principalmente de la normalización social de la llingua
asturiana nos conceyos y de la creación de Servicios de Promoción del
Asturiano (SPA), na marcación de la nueva situación política asturiana.


Ente les principales conclusiones d'estes xornaes, la Xunta destaca "la necesidá
inmediata de crear diferentes Servicios de Promoción del Asturiano na
alministración asturiana, nos conceyos y n'otres instituciones. Estos SPA
taríen encargaos de promocionar l'estatus de la llingua asturiana y de
fomentar y ampliar el so emplegu".

La XDLA recalcó que ye indispensable qu'estos SPA cunten con funcionarios
adscritos, dotación económico propio, y un Programa de Normalización
Llingüística específicu que marque los sos obxectivos y les sos llinies de
trabayu. N'opinión de la XDLA, "una mínima coherencia na defensa del
asturiano y la necesaria eficacia de les midíes de promoción llingüística
(inesistentes como tales hasta la fecha) faen indispensable que los SPA
tengan estes trés característiques básiques y definitories; ensin ello,
tolo que se faiga en promoción social del asturiano seríen midíes
cosmétiques y vacies, que taríen condergaes al fracasu". La Xunta tuvo en cuenta nestes xornaes modelos de servicios de promoción llingüística d'otros países, poro llegaron a la conclusión de que, "les esperiencies
n'otros países demuestren que los Servicios de Promoción Llingüística sólo
son eficaces nestes condiciones, y que constituyen el mediu más afechiscu
pa esparder la normalización social del idioma a tolos niveles".

Nestes xornaes tamién se tocaron otros aspectos, como cuales habríen ser
les funciones y obxectivos que garantizaríen la eficacia de la futura
Dirección Xeneral de Promoción Cultural y Política Llingüística, o'l
diseñu d'un plan urxente d'acción inmediata a favor del idioma.


La Xunta quier con estes xornaes presentar la so propuesta de como deben diseñáse los futuros servicios de normalización, que tan entamando a preparáse en conceyos como Xixón o Siero. La
XDLA va dar a conocer prósimamente a les instituciones interesaes los
documentos redactaos a lo llargo d'estes xornaes de trabayu.